DILI, 09 maiu 2023 (TATOLI) – Diretór Nasionál Ambulánsia Emerjénsia no Medikamentu (SNAEM.IP) Horacio Sarmento, informa hahú janeiru to’o marsu, aviaun ambulánsia transporta ona pasiente 44 mai halo tratamentu saúde iha Hospital Nasional Guido Valadares (HNGV).
“Durante fulan janeiru mai to’o marsu, ita halo ona transferénsia moras husi munisípiu hotu iha teritóriu nasionál hamutuk 44 mai halo tratamentu saúde iha Hospitál Nasionál Guido Valadares (HNGV)”, Horacio Sarmento, hateten iha nia kna’ar fatin Caicoli, ohin.
Nia dehan, pasiente sira ne’ebé mak halo transferénsia ho aviaun ambulánsia ne’e tanba kazu komplikasaun sira ne’ebé mak médiku sira labele atende, entaun transfere mai nasionál hodi hetan tratamentu intensivu husi espesialista sira.
“Kazu ne’ebé mak ita transfere ne’e kazu sira ho komplikasaun ne’ebé mak médiku sira labele atende ne’eba, entaun sira halo transferénsia mai nasionál tu ita-nia espesialista sira halo intervensaun”, nia afirma.
Nia esplika, aviaun ambulánsia halo operasaun, hahú iha tuku 8:00 dader to’o 17:00 lokraik maibé depende ba klima, se udan mak aviaun labele halo movimentu maibé klima bainhira di’ak sira bele transposta pasiente sira.
Tanba ne’e, Ministériu Saúde mantein halo kooperasaun ho empreza Mission Aviation fellowship (MAF) hodi atende nafatin ba pasiente sira ne’ebé mak moras.
Operasaun aviaun ambulánsia perkore de’it iha munisípiu ualu hanesan, Atauro, Baucau, Lautem Viqueque, Manufahi, Covalima, Maliana no RAEOA.
Tuir akordu ne’ebé hatuur iha kontratu katak operasaun aviaun ambulánsia Dili ba Ataúro Governu $350, Buacau $720, Lautem $ 1.070, Maliana $500,RAEOA $1.040, Manufahi $540, Covalima $700,no Viqueque $740.
Jornalista :Felicdade Ximenes
Editór : Zezito Silva
