Manatuto, 10 maiu 2023 (TATOLI)- Administradór Postu Administrativu Laleia, munisípiu Manatuto, Cosme Ximenes, hateten, Bee Timor-Leste, Empreza Públika (BTL, EP), iha programa no planu atu monta tanke bee rezervatóriu iha Laleia hodi fasilita komunidade asesu bee ho lalais.
“BTL mós planu atu monta tanke bee rezervatóriu nian iha Laleia, nune’e bele tau bee, atu komunidade sira bele asesu”, Administradór Postu ne’e hateten ba TATOLI,I.P via telefónika, kuarta ne’e.
Tanba tuir nia katak totál populasaun ne’ebé iha suku Cairui, Hutaralan no Lifau, Postu Administrativu Laleia nian hamutuk 4.950 ho nia xefe família hamutuk 1.375.
“Tanba daudaun ne’e bee-moos iha aldeia ida iha Suku Haturalan nian mak kuru hotu iha bomba bee nian, maibe avaria tiha. Nune’e ho planu BTL nian hodi tau tanke bee rezervatóriu hodi bele nesesita nesesidade komunidade nian”, nia kompromete.
Daudaun ne’e, nia dehan iha ona prosesu atu hadi’a, ne’ebé mak BTL mós haree direita ona no halo ona enkontru ho atu oinsá bele hadi’a bomba bee ne’e.
Entretantu nia dehan kona-ba estrada no eletresidade iha Laleia ema hotu asesu ona. Só bairru ida iha suku Lifau mak asesu foin lalais ne’e. Maibé to’o agora hotu-hotu asesu ona.
Jornalista : Osória Marques
Editór : Florencio Miranda Ximenes
