DILI, 10 maiu 2023 (TATOLI) – Eskola Bázika Filiál (EBF) Bairro Pité implementa ona Programa Merenda Eskolár ba estudante 803 ho totál orsamentu hamutuk $59.020. Merenda ba alunu sira ne’e ba loron efetivu hamutuk 175.
Eis-Koordenadór EBF Bairro Pité, Lucas Brandão da Silva, hatete merenda eskolár ba tinan ida ne’e iha ona mudansa tuir desizaun hosi Ministériu Edukasaun, ne’ebé deside ona hodi entrega ba conselho dos pais mak jere atividade ne’e depois maka hetan monitorizasaun hosi profesór sira.
“Programa ne’e jere hosi ita-nia inan feton sira iha Ekipa Jestaun Programa nian (EJP) depois maka ita-nia profesór sira halo de’it monitorizasaun”, Lucas Brandão ba Tatoli iha Bairro Pité, kuarta ne’e.
Nia esplika orsamentu ba merenda ne’ebé prevee ba eskola ne’e $44.968 ba de’it hahán ba alunu sira, tanba kada loron estudante ida sei han sentavu 0,32.
Enkuantu ba ekipa EJP sira sei hetan mós orsamentu $14,052 hodi utiliza ba sosa hahán sira ba merenda alunu sira-nia. “Ne’e duni, hosi totál verba ne’ebé prevee daudaun ba EJP sira kada loron sei gasta sentavu 7. Merenda eskolár ba EBF ne’e iha kada semana ne’e loron lima”, katak.
Tuir observasaun jornalista Tatoli nian sobre implementasaun programa ne’e tuir duni oráriu ne’ebé determina, maibé sei falta bikan no kanuru ba alunu sira atu han.
Ho kestaun refere maka Diretora Sentru hosi eskola filial ne’e, Filomena Caldeira Belo, promete ona sei prepara tan bikan no kanuru tanba daudaun ne’e iha de’it bikan 50 maka EJP sira utiliza ba merenda eskolár ba alunu 803 iha eskola refere.
Notísia relevante: Implementasaun Programa Merenda Eskolár iha EBF Bebonuk ho verba $28.546
Jornalista: Tomé Amado
Editora: Maria Auxiliadora
