AILEU, 10 maiu 2023 (TATOLI) – Diretór Agrikultura Munisípiu Aileu, João dos Santos, informa pesoál servisu estensionista sira hetan difikuldade kona-ba transporte baihira halao servisu loroloron.
“Ita-nia estensionista uluk iha de’it 16, halo servisu la konsege perkore hotu suku 33 iha Munisípiu Aileu. Entaun foin dadaun, ita halo pedidu ba Administradór munisípiu hodi halo rekrutamentu ba ita-nia estensionista no pedidu refere administradór aseita no halo rekuramentu tán ba estensionista hamutuk 23”, João dos Santos, hateten ba TATOLi iha kna’ar fatin MAP Aileu Vila, kuarta ne’e.
Hafoin Governu lokál halo tiha rekrutamentu ba iha estensionista sira ne’e, koloka kedan sira ba idak idak nian suku, hodi ajuda agrikultór sira oinsá atu halo akompañamentu hodi orienta teknika agrikultór, atu halo prosesu kultivasaun ho di’ak hodi aumenta produsaun rai-laran espesiál iha Munisípiu Aileu.
“Sira efetivu halo servisu hamutuk ho ita-nia agrikutór sira iha suku no aldeia sira. Ita agora daudaun koloka ona sira, iha Suku Seloi Kraik ne’e ita koloka estensionista nain-rua, tanba suku ne’e bo’ot presiza koloka estensionista nain rua”, nia informa.
Nia esplika, durante ne’e estensionista sira halo sira-nia servisu ho efetivu, maibé iha difikuldade ba transporte, tanba iha Aileu ne’e koñesidu ho munisípiu ne’ebé ho topográfu barak liu foho, distánsia hosi suku ida ba aldeia ida ne’e dook.
“Difikuldade ba ita-nia estensionista sira sempre iha, liuliu sira sei menus transporte, balun iha suku ida rurál tebes, tanba distánsia suku ba aldeia ne’e, nia tenke halo servisu lao ho oras barak” , João haktuir.
“Maibé parte Ministériu Agrikultura no Peskas (MAP) no Autoriedade Munisípiu Aileu, halo ona diskusaun hodi buka solusaun ba ida ne’e, oinsá tulun ita-nia estensionista sira, hodi fasilidade motorizada ba sira, hodi ajuda sira nian servisu loron-loron ho di’ak”, nia adianta.
Produsaun haree iha Aileu tinan kotuk sae 3.5 tonelada
Iha biban ne’e, Diretór Agrikultura Munisípiu Aileu, João dos Santos, informa iha Aileu totál área kultiva 389 etare.
“Tinan kotuk ita konsege prodús haree 3.5 tonelada, produsaun tinan kotuk sa’e makas no kolleita direta hosi Ministériu Agrukultura”, nia afirma.
Nia dehan, produsaun hare iha Munisípiu Aileu kuantidade sa’e makas tebes kompara ho tinan sira liu ona hanesan kuantidade produsaun haree iha Aileu atinje de’it 2 tonelada no 2.5 tonelada.
Jornalista: Natalino Costa
Editór : Zezito Silva
