Estrada ligasaun Grotu mai Same-Vila kotu difikulta movimentasaun komunidade
MANUFAHI, 10 maiu 2023 (TATOLI) – Estrada ligasaun hosi Suku Grotu mai kapitál Munisípiu Manufahi kotu kauza hosi udan no anin durante loron tolu. Tanba ne’e, Administradór Munisípiu Arantes Isaac Sarmento, orienta ona ekipa ida ba observa direta hodi halo normalizasaun.
“Situasaun ida akontese iha Grotu, ha’u rasik foti ona inisiativa no orienta ona ekipa tékniku ba halo kedan identifikasaun atu buka kedan kompaña ida hodi halo kedan rehabilitasaun ba estrada ne’e atu komunidade sira bele la’o ba mai”, Arantes dehan ba jornalista sira iha Same, kuarta ne’e.
Nia dehan, autoriedade munisipál tenke foti lalais medida atu halo proposta ida ba Ministériu Administrasaun Estatál (MAE) liuliu submete Ministériu Finansas (MF) atu bele hetan orsamentu fundu kontijénsia ida hodi finansia ba projetu ne’e tanba kategoria emerjénsia.
“Kona-ba estrada sira iha fatin seluk hanesan balu ne’ebé afeta ba sentru votasaun sira iha Manufahi laran, ita koordena ona ho administradór postu sira atu haree balun ne’ebé kondisaun grave, ita liga kedan ba IGEADI atu tun direta hodi normaliza”, nia hakotu.
Jornalista: Hortencio Sanchez
Editór : Zezito Silva
