Estrutura FRETILIN Manufahi husu Governu normaliza urjente Mota Laklo
MANUFAHI, 10 maiu 2023 (TATOLI) – Vise Sekretária Komisaun Polítika Partidu Frente Revolusionáriu Timor-Leste Independente (FRETILIN) Angelica da Costa, husu ba Governu liuliu Ministériu Obras Públika (MPO) atu hatun lalais mákina pezadu sira atu bele normaliza lalais Mota Laklo ne’ebé estraga komunidade Suku Uma-Berloc kuaze uma-kain 155.
“Hanesan partidu ne’ebé kaer mós hela ukun, ami haree komunidade sira ne’e ami fuan moras, ne’e mak ami to’o iha fatin ne’e, maibé ami rekomenda ba Governu atu haruka lalais mákina pezadu mai normaliza mota ne’ebé afeta ba ita-nia komunidade sira”, Angelica dehan ba jornalista sira iha Alas, ohin.
Iha fatin hanesan, Membru Komisaun Jurídiku Munisípiu Manufahi, Manuel Monteiro Fernandes reforsa katak haree ba situasaun ne’ebé komunidade sira hasoru mak partidu deside tun kedan iha fatin akontesimentu hodi fó apoiu ba vítima sira ne’ebé afetadu no hamutuk ho autoridade Manufahi evakua komunidade sira hosi fatin afetadu ba fatin seguru.
“Ajudu ne’ebé mak ami fó ohin ne’e la’os ba militante FRETILIN maibé ba komunidade afetadu hotu, la’os mai ho intesaun seluk maibé tuir kompromísu FRETILIN nian hodi fó solidaridade ba komunidade sira ne’ebé afeta inundasaun”, nia dehan.
Fretilin apoiu ba família vítima hamutuk 115, tipu apoiu mak hanesan foos, supermi, mina, masimidar, rinso, sabaun no seluk tan.
Jornalista: Hortencio Sanchez
Editór : Zezito Silva
