DILI, 10 maiu 2023 (TATOLI)-Deputadu husi Partidu Libertasaun Populár (PLP) no FRETILIN, husu ba Governu atu fasilita transporte ba sidadaun sira ne’ebé hela iha kapitál Dili atu bá vota iha munisípiu durante eleisaun lejizlativa 21 maiu 2023.
“Hanesan ita hatene Prezidente Repúblika veta tiha alterasaun lei Eleitorál ba Parlamentu Nasionál ne’ebé atu kria sentru votasaun paralelu, entaun labele fasilita ita nia eleitór sira ne’ebé barak mai iha Dili hanesan estudante, negosiante sira, hanesan ita hatene ita-nia populasaun barak mai hela Dili buka moris no eskola, entaun Governu presiza duni fasilita transporte ba sira hodi fasilita sira fila ba ida-idak nia munisípiu hodi partisipa iha eleisaun mai,” Deputadu PLP, Domingos dos Santos hateten ba Agênsia TATOLI iha uma fukun Parlamentu Nasionál, kuarta ne’e.
Tuir nia katak atu hasa’e tasa partisipasaun eleitór sira iha eleisaun lejislativa tinan ida ne’e maka meius ida Governu presiza fasilita duni transporte atu tula populasaun sira fila ba munisípiu idaidak hodi tuir eleisaun.
Nune’e mós Deputada FRETILIN, Lídia Norberta, reforsa katak Governu bele kria kondisaun liuliu prepara transporte ba sidadaun sira atu fila ba idaidak ninia munisípiu hodi partisipa eleisaun parlamentár.
“No sidadaun iha kooperasaun di’ak, hodi ezerse sira-nia votu ba eleisaun, tanba ne’e Governu tenke kria kondisaun di’ak, no bainhira sidadaun sira partisipa hotu tiha eleisaun bele fila mai Dili, hodi hala’o sira ida-idak nia atividade ka estudu,”nia hateten.
Jornalista: Nelson de Sousa
Editór: Agapito dos Santos
