Governu sentrál tuun direta halo levantamentu dadus ba mota Laklo Alas
MANUFAHI, 10 maiu 2023 (TATOLI) – Diretór Jeral Dezenvolvimentu Rurál Ministériu Administrasaun Estatál (MAE), Rozito Guterres, hamutuk ho ekipa Ministériu Obras Públika (MOP) hosi nasionál tuun direta ona mai mota Laklo hodi halo levantamentu dadus atu bele normaliza mota ne’e.
“Aban ne’e ekipa hosi Ekipamentu no Apoiu ba Dezenvolvimentu Infraestrutura (IGEADI-sigla portugés) hahú normaliza mota Laklo hodi salva komunidade afetadu uma-ka’in 100-resin ne’e iha Aldeia Kolokau Postu Administrativu Alas”, Rozito dehan ba jornalista sira iha Alas, kuarta ne’e.
Nia dehan, ekipa tékniku halo ona levantamentu, identifika ona pontu haat atu presizamente halo prevensaun no semana ne’e nia laran ekipa téknika prepara ona dezeñu, durante semana ida bele halo ona aprovasaun dezeñu no haruka ba Ministériu Finansa, uza fundu kontijénsia hodi implementa projetu emerjénsia ba kontrusaun barajen mota Laklo, hodi salva komunidade afetadu sira husi korénte mota.
“Agora daudaun ita koordena ona IGEADI hahú aban komesa halo ona normalizasaun ba mota Laklo, nune’e komunidade sira bele fila hikas ba sira nia hela fatin”, nia dehan.
Xefe Brigada IGEADI rejiaun Rosa Muki Ainaro, Manatutu no Manufahi, Januario Gusmáyo hateten, agora daudaun eskavatór ida iha ona mota Laklo, aban hahú ona halo normalizasaun.
“Agora ita-nia mákina ida iha ona mota laran, baintolu mákina ida sei mai tan, hodi normaliza mota ho metru 700, nune’e korénte mota bele halai tuir ninia fatin”, Januario hateten.
Iha fatin hanesan, Administradór Posto Administrativu, Alas Franco da Costa Duarte hateten, agradese tebes ba Governu sentrál ne’ebé bele tuun direta mai halo levantamentu dadus nune’e bele halo barajen bele normaliza bee halai tuir nia dalan.
“Ohin sira nasionál mai ona ne’e, agradese tebes, kleur liu semana ida maibé normalizasaun aban hahú la’o ona, sira dehan ne’e tenke halo duni barajen laos lori mákina dudu de’it lae, tenke halo barajen atu nune’e bele durasaun tempu naruk, nune’e komunidade sira bele fila ba hela iha sira nia fatin”, administradór adianta.
Jornalista: Hortencio Sanchez
Editór : Zezito Silva
