ERMERA, 10 maiu 2023 (TATOLI) – Partidu Kmanek Haburas Unidade Nasionál Timor Oan (KHUNTO) hato’o kompromisu polítiku katak bainhira povu fó fiar kaer IX Governu sei esforsu makaas hodi investe iha setór seguransa hodi prevene droga ilísita iha Timor-Leste.
Kompromisiu polítika ne’e hato’o husi José dos Santos “Naimori Bucar” iha kampaña Eleitorál partidu KHUNTO, iha Gleno, Munisípiu Ermera.
Naimori Bucar dehan, atu kombate droga, Estadu Timor-Leste presiza investe makaas iha setór seguransa hodi prevene droga labele tama Timor-Leste.
“Ita tenke hadi’a institusaun seguransa hanesan FALINTIL Forsa Defeza Timor-Leste (F-FDTL) no Polísia Nasionál Timor-Lorosa’e (PNTL), Alfandega no Emigrasaun atu nune’e bele prevene droga no ai-moruk aat sira labele tama mai ita-nia rai hodi estraga joven sira,” Naimori Bucar hateten iha ninia intervensaun durante kampaña polítka, iha Gleno Ermera, kuarta ne’e.
Nia dehan, Estadu tenke kria kondisaun no tau-matan ba PNTL hanesan garante transporte, no hela fatin atu sira moris ho dignu hodi defende joven sira.
“Ha’u hakarak konvida Timoroan tomak atu hanoin ba unidade nasionál tanba unidade nasionál mak garante futuru. Haluha pasadu no hanoin ba futuru tanba futuru mak ita-nia moris di’ak,” Líder ne’e apela.
Nia dehan, partidu KHUNTO hamriik atu asegura Timoroan moris hakmatek, atu nune’e Timoroan bele aproveita moris dignu.
Partidu KHUNTO mós kompromete atu kontinua halibur joven sira husi organizasaun Arte Marsiál no Rituál oi-oin hodi promove dame ha Timor-Leste.
“Ita luta para joven ne’e hamutuk. Ha’u mai ho fuan atu harii páz ba jerasaun foun sira,” Naimori akresenta.
Iha kampaña refere, Prezdente Partidu KHUNTO, Armanda Berta mós hato’o programa prisnsipál Partidu Khunto nian foka ba Saúde, Agrikultura, Turizmu, Seguransa, Ekonomia, Justisa, no seluktan.
Partidu KHUNTO mós kompromete sei kontinua implementa program atuál husi VIII Governu nian mak hanesan, Uma Naroman ba Povu, Subsídiu Fim do Ano, Subsídiu Jerasaun Foun, Subsídiu ba Idozu sira, Cesta Bázika, no seluktan.
Jornalista: Filomeno Martins
Editora : Nelia Borges
