MANUFAHI, 10 maiu 2023 (TATOLI) – Xefe Suku Betano Postu Administrativu Same Munisípiu Manufahi, Filipe de Araujo, informa Mota Karau-Ulun ho korente ne’ebé makas rezulta sobu barajen mota-ninin no fó ameasa ba uma komunidade nian 500-resin no natar etare 200. dezastre ne’e akontese tanba udan bo’ot durante loron haat.
“Iha ne’e ita-nia barejen mota nian, halo hosi Kompaña Romantis ne’ebé kuaze metru 300-resin, agora daudaun mota sobu ona, ho udan boot ida foin loron haat liubá, udan iha Same la para halo mota boot no estraga ona barajen sira ne’e monu hotu ona no atu besik tama ona ba natar komunidade sira nian, hahú agora ba oin mak udan ne’e la para mak mota bele sobu ona natar hamutuk etare 200 no komunidade nia uma 500-resin”, Xefe Suku dehan ba Agência TATOLI via telefone, kuarta ne’e.
Nia rekorda, iha tinan kotuk bainhira akontese udan bo’ot, xefe suku ne’e informa ona ba administradór munisípiu no Governu sentrál, hanesan Ministériu Obras Públika (MOP) tun direta ona ba fatin akontesimentu foti ona dadus balun maibé to’o agora laiha rezultadu.
Tanba ne’e, nia husu ba Governu sentrál atu tau matan, hirak ne’ebé iha poder liu labele matan dukur ba situasaun ne’e tanba situasaun ne’e fó ameasa bo’ot ba komunidade no produtu agrikultura iha Betano.
“Governu sira labele matan dukur ba situasaun ne’e, se mota ne’e sobu mak estraga komunidade sira nia hela fatin no produtu agrikultura nian barak hanesan haree, hudi, modo no seluk tan tanba baibain kareta sira mai tula lori ba merkadu sira munisípiu no nasionál ne’e sai hosi ne’e”, nia hakotu.
Jornalista: Hortencio Sanchez
Editór : Zezito Silva
