Partidu PR kompremete sei hadi’a infraestrutura, edukasaun no bee-moos
DILI, 10 maiu 2023 (TATOLI)— Partidu Republikanu (PR), ho nomeru sorteiu 09 kompromete sei hadi’a infraestrutura, edukasaun no bee-moos wainhira povu fo fiar kaer ukun iha governasaun dasia.
Partidu PR promote liu hosi kampanha ho fahe brosura ba komunidade sira iha Cristo Rei, Dili, tersa lorokraik.
“Programa infraestrutura, maka ita hakarak hadia dalan para oinsa fasilita ita nia komunidade no sosiadade liuliu ba ita nia povu iha ne’e. Nomos, liu-liu iha ita nia aldeia ne’e, bele lori nia produtu ba iha Dili laran para nune’e bele hasae sira nia rendimentu ekónomiku,” hateten Sekretario Jeral Interino Partidu PR, Venansio Sarmento ba jornalista iha kampanha ho tipu fahe brosura iha Aldeia Lenuk Hun, Posto Administrativo Cristo Rei Dili, tersa ne’e.
Nia hateten, problema bé iha aldeia refere, tinan 20 resin ona, desde Timor- Leste restaura ninia independênsia, maibe nafatin iha problema bee, no estrada. Tamba ne’e, mak Partido PR hetan konfiansa iha Eleisaun Parlamentar, sei dada bee-moos, liu-liu mai iha aldeia Lenuk Hun.
“Terseiru program mak ba área edukasaun. Ita hare’e katak distansia, eskola husi ne’e ba Dili dook. Entaun ita identifika karik povu fo fiar ita bele hadia eskola Ensino Bázika iha ne’e hodi fasilita ita nia oan sira eskola besik iha ne’e, para labale gasta sira nia tempo la’o do’ok ,” Venansio dehan.
Ho ida ne’e, nia hatutan, kuandu Partidu PR hetan konfiansa iha Eleisaun Parlamentar promote sei hadia dalan, dada bé no mos harii eskola Ensino Bázika iha ne’e.
Jornalista : Mirandolina Barros Soares
Editora : Armandina Moniz
