iklan

MANATUTO

Servisu Edukasaun Manatuto rejista profesór idade reformadu na’in-95

Servisu Edukasaun Manatuto rejista profesór idade reformadu na’in-95

Mapa Munisípiu Manatuto. Imajen-Infografia/Octavio de J.Guterres

Manatuto, 10 maiu 2023 (TATOLI)— Diretór Servisu Edukasaun Munisípiu Manatuto, Graciano de Jesus Baptista, hateten daudaun ne’e rejista profesór idade reformadu na’in-95, atu reforma, maibé Ministériu Edukasaun Juventude no Desportu (MEJD) seidauk foti desizaun.

“Ita-nia profesór iha edukasaun Manatuto nian ne’ebé idade liu 60 ne’e, ami iha na’in-95, no ami mós iha funsionáriu reformadu hamutuk na’in-neen. Entaun ita profesór idade reforma hamutuk 101. Sira-ne’e sei kontinua servisu tanba parte kompetente seidauk iha desizaun”, Diretór ne’e hateten iha kna’ar fatin Manatuto, kuarta ne’e.

Nia dehan ho reformadu sira-ne’e, hein katak MEJD bele haree no solusiona kestaun ne’e. Tanba entre sira balun idade to’o ona 75.

“Ha’u hanoin reforma lalais di’ak liu tanba ida-ne’e mós iha nia vantajen ba halo rekrutamentu seluk fali seluk. Tanba ema agora gradua barak-barak”, nia hateten.

Tuir nia laiha baze ida atu dehan profesór idade 60-resin tama lista reformadu, tanba ne’e to’o agora sira iha vontade no esforsu hanorin.

“Ida-ne’e ami labele dehan profesór tama lista reformadu, tanba ita seidauk hetan orientasaun hosi Governu atu temi profesór reformadu. Ami seidauk simu orientasaun atu tau lista reformadu sira. Ami só dehan profesór idade liu 60”, nia hateten.

Bazeia ba lei númeru 6/2012 no dekretu-lei númeru 23/2012, funsionáriu hotu iha MEJD iha rejime rua hanesan rejime jerál ba funsionáriu administrasaun no rejime espesiál ba profesór sira.

Jornalista : Osória Marques

Editór        : Florencio Miranda Ximenes

iklan
iklan

Leave a Reply

iklan
error: Content is protected !!