LIQUIÇA, 10 maiu 2023 (TATOLI)— Sekretariadu Tekniku Administrasaun Eleitor (STAE) Munisípiu Liquiça deside aluga tan viatura 28 hodi transporta material eleisaun ba sentru votasaun sira.
Diretór STAE Munisípiu Liquiça, Mario dos Santos Martins esplika, bainhira tama ba Eleisaun Parlamentar (ElPar), STAE iha responsabildiade prepara viatura atu transporta material sira ba iha sentru votasaun.
“Entaun ita mos iha ne’e ho apoiu husi nasional no ita mos iha planu ba aluga viatura, maizumenus iha sentru votasaun ida ita tenke iha viatura ida tanba sentru sira ne’e nia distansia dook. Iha Liquiça ita planu ba aluga viatura 28,” Mario dos Santos Martins dehan ba Tatoli.
Nia hateten, dadauk ne’e viatura ne’ebé STAE iha hamutuk 18 maibé hafoin tekniku sira halo verifikasaun, viatura balun ho kondisaun ladiak nune’e presiza tan apoiu husi nasional.
Mario dos Santos Martins relata, total viatura ne’ebé presiza hodi transporta material eleitoral ba sentru votasaun sira iha Munisípiu Liquiça hamutuk viatura 60, nune’e sura hamutuk husi aluga viatura 28 inklui viatura 18 husi STAE Liquiça nune’e presiza tan 30 resin hodi apoiu.
STAE rasik prepara ona brigadista hamutuk 85 inklui polling staff 1.060 ne’ebé tuir ona formasaun durante loron haat.
“Sira ne’e hetan ona formasaun mak ema nebe atu servisu ba eleisaun parlamentar ida ne’e. Ita iha fiskais 1060 no ne’e preparadu ona,” nia afirma.
Munisípiu Liquiça iha eleitor hamutuk 53,084 ne’ebé kompostu husi Postu Adminitrativu tolu (3), no suku 23 ne’ebé sei halo votasaun iha sentru votasaun 85.
Jornalista : Cidalia Fátima
Editora : Armandina Moniz
