Administradór rekomenda Governu dezenvolve turizmu relijiozu iha Soibada
MANATUTO, 11 maiu 2023 (TATOLI)—Administradór postu administrativu Soibada, munisípiu Manatuto, Luis Gonzaga da Silva, rekomenda ba Governu atu hadi’a no dezenvolve fatin relijiozu no natureza istóriku sira iha Soibada.
“Ha’u hakarak rekomenda ba Governu tenke hadi’a no dezenvolve fatin relijiozu no natureza istóriku sira, fatin rezistensia, no mós foho krus, iha bee-manas ne’ebé ita bele halo hodi sai fatin turizmu, nune’e bele atrai ita-nia vizitante lokál no Internasionál hodi vizita,” nia hateten ba Agência Tatoli liuhosi telefónika, kinta ne’e.
Nia dehan, fatin sira-ne’e mak bainhira Governu hadi’a no dezenvolve bafatin turizmu halo di’ak, sei hetan reseita di’ak ba Estadu.
“Ha’u hanoin asuntu ne’e parese governasaun foun mak bele halo planu no realiza tanba hela fulan balun de’it. Ho ne’e, ha’u husu ba IX Governu ne’ebé mai tenke tau matan ba ami-nia fatin sira-ne’e. Tanba, fatin ne’e fatin ne’ebé uluk hela iha ne’e mesak ema matenek de’it,” nia hateten.
Tanba, tuir nia, fatin sira-ne’e sai istória ba futuru labarik no joven sira hodi kontinua halo furak no atrai liután turista sira hosi nasaun oioin.
“Maibé presiza mós hadi’a estrada, dada bee-moos ba besik fatin sira-ne’e, no dada eletrisidade nune’e kalan bele fó naroman ba fatin ne’e. Tanba to’o agora ami-nia estrada hosi ponte foun Soibada mai to’o vila la di’ak no bainhira udan ema labele asesu. Ida-ne’e Governu mai tenke tau prioridade mós ba asuntu ne’e,” nia hateten.
Jornalista : Osória Marques
Editór : Cancio Ximenes
