AINARO, 11 Maiu 2023 (TATOLI) – Eletrisidade de Timor-Leste, Empreza Públika (EDTL, EP) munisípiu Ainaro sei implementa Projetu Eletrifikasaun Komunitáriu (PEK) ba aldeia hitu ne’ebé seidauk asesu ba energia elétrika.
Xefe Unidade EDTL munisípiu Ainaro, Júlio de Sá Benevides, informa maioria suku asesu ona ba enerjia elétrika, maibé sei hela aldeia balun maka seidauk, tanba ne’e EDTL servisu hamutuk ho komunidade hodi aselera instalasaun eletrisidade.
“Ami atu implementa projetu iha Bairru Bee Moos, suku Foho Ai-Liko, postu administrativu Hato-Udu. Projetu ne’e sei dada mos liña eletrisidade ba aldeia Goulema, suku Horai-Kiik, aldeia Rabilau no aldeia Goulema, suku Maubisse, inklui aldeia Ernaru, suku Manelobas ho aldeia Kirikoli no Daulelo, suku Manetu, postu adminsitrativu Maubisse”, dehan Júlio de Sá Benevides ba Tatoli, iha nia servisu fatin, Ainaro Vila, kinta ne’e.
Nia dehan iha possibilidade projetu ne’e sei implementa iha semana oin, tanba materiál esensiál agora dadauk armazena iha Maubisse no edifísiu EDTL Ainaro Vila.
“Lolos ne’e ami halo ona servisu, maibé iha fallansu balu, liuliu kona-ba dokumentu sira hodi halo rekrutamentu ba pesoál kazual no aluga kareta hodi tula materiál ba fatin destinadu”, nia esklarese.
Tuir nia, kazuál ne’ebé EDTL rekruta ne’e hodi fó apoiu ba ke’e rai-kuak, hatur poste eletrisidade no tesi-ai.
Kestiona kona-ba aldeia sira iha postu Hatu-Builiko ne’ebe seidauk asesu ba liña eletrisidade, Júlio de Sá Benevides hateten pesoál EDTL hamutuk ho líder komunitáriu sei halo hela levantamentu dadus.
Notísia relevante: Viqueque benefisia projetu dada eletrifikasaun neen
Jornalista: Afonso do Rosário
Editora: Isaura Lemos de Deus
