COVALIMA, 11 maiu 2023 (TATOLI)–Koordenadór Bee Timor-Leste, Empreza Públiku (BTL, E.P) Covalima, Castro Dody Ramos, hateten BTL, E.P provizóriu sei hapara distribuisaun bee-moos ba komunidade iha área urbana, tanba mákina bomba iha parte Sukabilar, suku Suai Loro avaria.
“BTL, EP Covalima enfrenta problema mákina bomba sentrál iha área Sukabilar área urbana ne’ebé avaria, nune’e provizóriu komunidade iha zona 1 to’o zona 4, iha área urbana labele asesu bee-moos tanba bee matan ida-de’it atu distribui bee-moos ba komunidade,” Castro Dody Ramos hateten ba Agência Tatoli, iha Suai Loro, kinta ne’e.
Hafoin BTL, E.P halo identifikasaun mákina bomba avaria, tékniku BTL, E.P foti medida servisu hamutuk ho Tékniku Eletrisidade Timor-Leste, Empreza Públika (BTL, E.P) no haruka karta BTL, E.P nasionál nune’e tempu-badak bele troka mákina bomba foun.
Tuir identifikasaun hosi tékniku EDTL, E.P hatudu panel ho mákina bomba aat, nune’e labele hadi’a presiza halo instalasaun fali mákina bomba foun, nune’e bele halo distribuisaun bee-moos ba komunidade iha área urbana ho normál.
Mákina bomba iha Sukabilaran avaria, provizóriu komunidade iha área urbana labele asesu bee-moos tanba iha área urbana dependénsia ba de’it bee-matan iha Sukabilar, ida-ne’e sai problema ba BTL, E.P Covalima.
Atu labele dependénsia de’it ba bee-matan iha parte Sukabilaran, BTL, E.P Covalima asina ona kontratu ho kompañia Jufado Unipesoál, Lda, ne’ebé hahú halo ona instalasaun bee-moos nune’e bele garante distribuisaun bee-moos ba komunidade iha área urbana.
Jornalista : Celestina Teles
Editór : Cancio Ximenes
