MANATUTO, 11 maiu 2023 (TATOLI)—Administradór postu administrativu Soibada, munisípiu Manatuto, Luis Gonzaga da Silva, hateten Bee Timor-Leste, Empreza Públiku (BTL, E.P) hahú dada bee-moos ba xefe família besik 600 iha Soibada.
“Iha Soibada, daudaun ne’e BTL halo konstrusaun foun ba bee-moos hodi dada bee ba ita-nia xefe família besik 600,” nia hateten ba Agêbcia Tatoli liuhosi telefónika, kinta ne’e.
Luis Gonzaga hatutan, konstrusaun foun bee-moos ne’e foin mak atinje 30% tanba agora mak foin kee rai-kuak, dada paralon, halo tanke bee nian, iha territóriu Soibada nian maibé iha xefe família balun ne’ebé asesu ona bee-moos oferese hosi Programa Nasionál Dezenvolvimentu Suku (PNDS).
Totál populasaun iha Soibada liu 4.000 no ho nia xefe família hamutuk 600 iha suku Manufahi, Fatumakerek, Leohaat, Samoro no Manlala.
Jornalista : Osória Marques
Editór : Cancio Ximenes
