DILI, 11 maiu 2023 (TATOLI) – Partidu Kongresu Nasionál de Rekonstrusaun Timor-Leste (CNRT) rejista katak militante 13 sai vítima hahú hosi abertura kampaña iha Manatuto to’o ohin loron, tanba hetan tuda hosi militante forsa polítika seluk.
Portavós no Koordenadór Polítika Esterna Partidu CNRT, Roberto Soares, dehan katak militante13 ne’ebé hetan kanek ne’e partidu konsidera nu’udar vítima, maibé depois kazu ne’e submete ba prosesu investigasaun iha Komandu Polísia sai fali suspeitu.
“Ita-nia militante 13 sai vítima hosi militante partidu sira seluk ninia asaun tuda fatuk ba ita-nia militante sira bainhira fila bá uma ne’e agora sai fali suspeitu iha Polísia. Ema sira ne’ebé tudak kanek tiha ita-nia militante sira ne’e, sira maka ba hato’o keixa uluk ba Polísia, entaun ita-nia militante mak suspeitu fali”, dehan Roberto Soares iha konferénsia imprensa ne’ebé hala’o iha Bairro dos Grilhos, kinta ne’e.
Tuir portavós, prosesu normál ida ne’ebé akontese iha prosesu judisiáriu. “Ohin loron ita-nia militante sira ne’e konsidera nu’udar suspeitu, maibé sira mós iha direitu hato’o deklarasaun depois iha prosesu justisa mak sei deside, sé loos mak vítima no sé loos mak suspeitu”.
Partidu CNRT iha ona ekipa atu kontinua akompaña hela prosesu ne’e hodi lori vítima sira la’o tuir dalan justisa, tanba partidu lakohi atu kondena ema ida, maibé entrega ba parte justisa maka sei prosesa kazu ne’e hodi bele hatene loloos sé mak autór ba kazu tuda fatuk iha munisípiu sira durante kampaña.
Nia relata agresaun fízika hasoru militante no simpatizante CNRT iha terrenu ne’e akontese iha Viqueque, Baucau, Dili Aileu no Ainaro. “Hosi Baukau partidu identifika militante na’in-lima mak hetan kanek hosi akontesimentu iha Uailili no munisípiu sira seluk sei iha prosesu rekolla informasaun”.
Nune’e, CNRT husu ba partidu polítiku sira ne’ebé maka nia militante halo ona asaun fízika hasoru apoiante CNRT ne’e tenke halo edukasaun sívika ba sira atu iha étika hodi labele hala’o asaltu no violénsia hasoru populasaun ka militante partidu refere no sira seluk.
“Tanba ne’e, halo polítika ho étika. Labele insentiva militante sira atu halo atake no intimida militante sira seluk. Kazu sira ne’ebé akontese hasoru militante CNRT ne’e hatudu prova lubuk ida. CNRT konsidera militante sira ne’e hatudu ona dezrespeitu ba étika polítika, maibé lideransa balun ko’alia ona ho autopiedade tomak maibé violasaun mós kontra prinsípiu Estadu de direitu demokrátiku ne’ebé nasaun ne’e adopta hela”, afirma.
Ho asaun sira ne’ebé maka akontese ona ba militante sira, CNRT ho estrutura tomak hato’o solidariedade ba vítima sira ne’ebé durante ne’e enfrenta situasaun ne’ebé la espera atu akontese ba sira ne’ebé hetan tuda hosi militante sira seluk no balun sei kontinua halo hela tratamento.
“CNRT sei akompaña sira liuhosi orasaun no dezeju as melhoras ba sira atubele filafali kontribui sira-nia direitu nu’udar sidadaun ne’ebé kontempla tuir Estadu de diretu demokrátiku”, realsa.
Jornalista: Tomé Amado
Editora: Maria Auxiliadora
