MALIANA, 11 maiu 2023 (TATOLI) –Prezidente Partidu Kongresu Nasionál Rekonstrusaun Timorense (CNRT), Kayrala Xanana Gusmão, promete bainhira povu fó fiar iha eleisaun Parlamentár hodi forma governu da-sia sei tau prioridade ba ferik, katuas no ema ho defisiénsia inklui rezolve problema veteranu.
Xanana Gusmão hato’o kompromisu polítiku ne’e iha kampaña ho tipu komísiu ne’ebé hala’o iha kampu futeból Maliana, munisípiu Bobonaro, kinta ne’e.
Eis Prezidente Repúblika ne’e hateten, partidu CNRT hakarak fó atensaun ba ferik no katuas sira tanba Timor-Leste independénsia tinan 20 resin ona, maibé sira barak mak sei moris terus hela, liuliu sira-ne’ebé hela iha área rurál.
Líder istóriku ne’e haklaken, ferik katuas sira merese hetan previleiju iha ukun-aan nia laran tanba osan hosi fundu petroliféru na’in mak povu.
“Partidu CNRT manán prioridade primeiru katuas ferik sira-ne’ebé terus tinan 24 nia laran, ohin loron moris aat-liu, estadu la’ós atu selu favór maibé estadu hamriik tanba imi-nia determinasaun ne’e. Prioridade daruak mak sei fó ba maluk defisiénsia sira atubele kontribui ba dezenvolvimentu nasionál,” Xanana promete.
Xanana dehan, bainhira CNRT manán iha eleisaun lejizlativa tinan ne’e mak sei halo auditoria ba serbisu governu atuál tanba durante mandatu tinan liman gasta billaun $11, maibé povu sei barak mak sei moris terus no dezenvolvimentu seidauk la’o ho di’ak.
Nune’e mós Partidu CNRT ho númeru sorteiu (12) ntau prioridade ba polítika desentralizasaun administrativa no podér lokál hodi hakbesik governu ba to’o iha baze atubele rezolve porblema ne’ebé povu enfrenta durante ne’e.
Xanana hatutan, liu
hosi podér lokál mak bele aselera dezenvolvimentu ba to’o iha baze no hamoris ekonomia iha rai laran.
“Kuandu Prosesu desentralizasaun, ha’u sei tún mai hamutuk ho imi atu ko’alia iha Lolotoe halo saida, iha Atabae halo saida, iha Balibó no Cailaco halo saida. Ha’u sei mai ita hamoris ekonomia,” nia katak.
Xanana husu ba militante, simpatizante no apoiante sira atu vota númeru (12) nune’e bele implementa programa hirak-ne’e tanba CNRT mai ho misaun, vizaun no prinsípiu ida atu luta ba dezenvolvimentu nasionál no hadi’ak Povu nia moris.
Enkuantu kampaña ne’e superviziona ho ofisiál supervizaun eleitorál hosi Komisaun Nasionál Eleisaun (CNE, sigla portugés), observadór nasionál Provedoria dos Direitus Humanu no Justisa (PDHJ) no hetan seguransa másimu hosi Polísia Nasionál Timor-Leste, Komandu Munisípiu Bobonaro no Unidade Patrullamentu Fronteira (UPF).
Jornalista: Sérgio da Cruz
Editór: Evaristo Soares Martins
