Embaixadora Kuba hala’o vizita kortéjia ba RAEOA
OÉ-CUSSE 11 maiu 2023 (TATOLI) – Embaixadora Kuba iha Timor-Leste, Grisel Alina Aldama Inniss, kinta ne’e hala’o vizita kortéjia hodi realiza enkontru ho Prezidente Autoridade Rejiaun Administrativa Espesiál Oé-Cusse Ambeno (RAEOA).
Iha oportunidade ne’e, diplomata kubana ne’e, reprezenta povu Kuba felisita povu Timor-Leste tanba iha loron 20 maiu selebra aniversáriu loron restaurasaun independénsia no loron eleisaun iha loron 21 maiu.
Hanesan mós tinan 70 kolaborasaun internasionál, iha ne’e brigada médiku kubanu sira, hala’o ninia misaun iha nasaun hotu-hotu, ne’ebé maka oferese servisu ba iha nasaun maun alin, sira-ne’ebé durante ne’e apoia ona.
“Ohin hanesan vizita kortéjia ida, depois halo mós revizaun ba servisu sira-ne’ebé durante ne’e brigada médiku kubanu sira halo ona iha Oé-Cusse,” Embaixadora kubanu iha Timor-Leste, Grisel Alina Aldama Inniss, informa ba jornalista sira iha Oé-Cusse.
Prezidente Autoridade RAEOA, Arsénio Paixão Bano, agradese ba vizita ofisiál ne’e.
Arsénio Bano, agradese ba Governu Kuba nia apoia, dezde Timor-Leste restaura nia independénsia, Timor-oan barak mak hala’o estudu, no to’o ohin loron serbí daudaun ona iha Timor-Leste.
“Ita agradese tanba Autoridade RAEOA mós dezloka ona médiku rua hasai espesialista iha Kuba agora estudu hela, tinan ne’e mós ita sei haruka tán na’in-neen, sei kontinua ba estudu espesialista iha Kuba, entaun ohin ha’u hato’o ba embaxadóra, katak Oé-Cusse hakarak prodús espesialista barakliu tán, entaun RAEOA ho nia orsamentu rasik, haruka nia estudante ba li’ur, tanba daudaun ne’e mós doutór rua kontinua estudu iha Indonézia, entaun vizita ofisiál ne’e, atu demostra katak, Kuba nafatin iha interese atu apoia Timor-Leste iha setór saúde,” nia orgullu.
Tuir dadus hosi Sekretariu Rejionál ba Asuntu Saúde Oé-Cusse, katak totál médiku hosi Kuba hala’o servisu iha fasilidade saúde Oé-Cusse hamutuk na’in-11.
Jornalista: Abílio Elo Nini
Editor: Evaristo Soares Martins
