MANUFAHI, 11 maiu 2023 (TATOLI) – Xefe Suku Bubususu Postu Administrativu Fatuberliu Munisípiu Manufahi Estanislao Borges, informa estrada ligasaun Suku Bubususu ba Fahinehan ne’e aat total, kauza hosi udan durante loron haat iha semana kotuk difikulta movimentasaun transporte sira atu movimentu ba mai.
“Estrada hosi Bubususu ba Fahinehan ne’e kotu totál, kareta mós la liu, Governu tenke mai lalais hadia liuliu Ministériu Obras Públika (MOP) tanba se la mai hadia mak difikulta ba sentru votasaun hamutuk haat iha suku ne’e labele lori materiál sesnsitivu sira mai hodi selerasaun eleisaun iha 21 maiu agora”, Xefe Suku dehan ba jornalista sira iha Same, kinta ne’e.
Nia haktuir sentru votasaun hirak ne’ebé labele ba mak Kaikasa ba Ailalek, Fahinehan ba Fatukilat no Bubususu rasik iha sentru votasaun rua.
“Dalan sira ne’e aat totál, kareta labele liu kedan, só ema la’o ain mak bele liu”, nia dehan.
Ho situasaun ne’e, hanesan autoridade lokál informa ona ba administradór posto no munisípiu maibé seidauk iha informasaun to’o agora.
Xefe Suku Fahinehan Antonio da Conseição Tilman, relata estrada ligasaun hosi Bubususu ba Fahinehan no hosi Same-Vila ba Fahinehan garve totál halo kareta labele liu.
“Estrada sira ne’e aat bainhira udan boot akontese loron hira tutuir malu ne’e mak halo aat hotu kedan ne’e, transporte públiku hanesan kareta labele liu, agora ha’u mai haree hela atu liga ba Administradór Postu Fatuberliu atu liga ba administradór munisípiu atu bele liga ba nasionál hodi mai halo urjente”, nia adianta.
Nia hatutan, bainhira Governu sentrál la tau atensaun lalais mak sei difikulta ba sentru votasaun haat iha Fahinehan.
Governu la tau prioridade ba estrada ne’e mak sei difikulta sentru votasaun hamutuk ualu hanesan Fahinehan haat no Bubususu haat.
Jornalista: Hortencio Sanchez
Editór : Zezito Silva
