AILEU, 12 maiu 2023 (TATOLI) – Família hamutuk Konsellu Kombatente Libertasaun Nasionál (CCLN, sigla portugés) iha Aileu Haloot Saudozu Malibere Marcos Exposto ‘Odamatan’ iha jardin Herois Pátria Aileu.
Saudozo Odamatan lakon vida tanba sofre moras Asma, nune’e família halo tratamentu, maibé la konsege rekopera nia saúde to’o ikus Saudozu Odamatan hakotu iis iha Ospitál Maubisse.
Hafoin hakotu iis, família hamutuk CCLN Munisípiu Aileu, husu Estadu haloot saudozu iha jardin Erois Pátria.
Prezidente Repúblika liuhosi Dekretu Prezidensiál númeru 32/2023 deside hato’o Saudozu Malibere Marcos Exposto iha Jardim Erois Pátria iha Munisípiu Aileu.
Prezidente CCLN Munisípiu Aileu, Zacarias de Fátima’Maputo’ Konsellu Veteranus Munisípiu Aileu sente triste tanba lakon ona luta-na’in ida ne’ebé durante ne’e fó kontribuisaun mós ba rai doben Timor-Leste.
“Hanesan Prezidente CCLN munisípiu Aileu sente triste tanba lakon ema ne’ebé di’ak, fó ona nia kontribuisaun ba Timor-Leste nia luta ba auto-determinasaun liuhosi servisu kladestina nian hodi hetan kapturasaun oin no hetan alezadu mós”, Zacarias de Fátima’Maputo’ iha nia intervensaun serimónia funebre saudozu Malibere Marcos Exposto Odamatan iha Jardim Erois Pátria Aissirimou, kinta ne’e.
Nia hatutan, CCLN Munisípiu Aileu mós sente lakon bo’ot ho prezensa saudozu Malibere nia mate, tanba hola parte mós estrutura CCLN Munisípiu Aileu.
Iha fatin hanesan, Administradór Munisípiu Aileu, Abel da Conceição mós hato’o sentimentu triste ba falesimentu Saodozu Marcos Exposto.
“Aileu lakon nia ema di’ak, reprezentante povu Aileu, ha’u hato’o sentidu kondolénsia profundu ba família sira”, nia dehan.
Iha fatin hanesan, reprezentante família saudozu Marcos Malibere, Luis Exposto espresa nia sentimentu triste tebes, tanba lakon ona aman ida ne’ebé di’ak hodi tau-matan ba oan sira.
“Husu ba Governu liuhosi Konsellu Kombatente Libertasaun Nasionál atu tau matan ba oan kiak nain sira. Saudozu iha oan nain hitu, nain rua de’it mak servisu no nain lima seluk seidauk. Ami tau matan de’it ba tempu badak, maibé ba tempu naruk ami labele tau matan, tanba ne’e husu Estadu atu bele tau matan ba oan ki’ak sira”, nia rekomenda.
Biografia haloot Saudozu Malibere Marcos Exposto ‘Odamatan’
Saudozu Malibere Marcos Exposto ‘Odamatan moris iha aldeia Heraheto suku Fatubosa Aileu Vila Munisípiu Aileu 15 agustu 1964.
Saudozu Odamatan, oan datoluk hosi maun-alin na’in 12 hosi Paulino Exposto no Paulina Exposto nia oan.
Saudozu Odamatan remata de’it ni estudu iha nivél pré-sekundaria iha SMP São Pedro no São Paulo Aileu.
Saudozu Malibere Marcos Exposto “Odamatan” hahú nian envolvimentu iha funu iha tinan 1981 to’o 1999 envolve aan iha kaixa Frenti Klandestina no partisipa iha organizasaun órgaun Oitu. Organizasaun asosiasaun kombatente brigada negra, organizasaun sagrada família no organizasaun komfederasaun rezistensia.
Iha tinan 1997 matebian hetan mós kapturasaun hosi militár Indonézia no aleiza nu’udar difisiente fiziku to’o remata nia jornada moris iha mundu ne’e.
No, ikus iu mak Sadozu Malibere partisipa mós iha vida polítika hahú hosi hafoin Timor-Leste restaura nia independénsia iha tinan 2001 to’o tinan 2023 to’o saudozu hakotu iis.
Entretantu seremónia funebre Saudozu Malibere Marcos Exposto nian iha jardim Herois da pátria Munisípiu Aileu hetan partisipasaun mazimu hosi CCLN Munisípiu Aileu, repzentante Ministru Asuntu Kombatente Libertasaun Nasionál, entidade sivil no militár munisípiu Aileu inklui família no parente hosi saudozu nian.
Jornalista: Natalino Costa
Editór : Zezito Silva
