DILI, POLÍTIKA

Komisaun B husu joven hakribi violénsia hodi kontribui ba pás

Komisaun B husu joven hakribi violénsia hodi kontribui ba pás

Deputada Parlamentu Nasionál hosi Bankada FRETELIN, Lídia Norberta dos Santos Martins. Imajen Tatoli/Francisco Sony

DILI, 11 maiu 2023 (TATOLI)—Membru Komisaun B trata asuntu Negósiu Estranjeiru no Defeza ho Seguransa iha Parlamentu Nasionál, Deputada Lídia Norberta, husu ba joven sira atu hakribi violénsia hodi kontribui ba pás iha rai-laran.

“Iha ita-nia rai ne’e Estadu direitu demokrátiku ne’e, sidadaun hotu iha direitu atu kontribui ba dezenvolvimentu no mós iha devér ba dezenvolvimentu ne’e rasik. Iha konstituisaun mós prevee, entaun iha ne’e joven sira nia papel iha dezenvolvimentu ne’e importante tebes maibé ho situasaun ne’ebé hanesan horisehik akontese hanesan komisaun B husu alin joven sira favór ida ita-nia rai ne’e ukun an ona, tan ne’e rai ne’e presiza ita hotu nia kontribuisaun. Favór ida, hadook an hosi violénsia hodi kontribui ba pás,” Deputada Lídia Norberta hateten ba Agência TATOLI iha Parlamentu Nasionál, kinta ne’e.

Deputada membru komisaun B hato’o apelu ne’e relasiona ho konfrontu entre joven iha Bairru Hudi Laran, Dili, iha kuarta (10 maiu 2023 ne’ebé rezulta balun kanek no uma komunidade nian balun hetan estragu, tanba ne’e presiza kontribuisaun joven ba pás no estabilidade tanba daudaun ne’e mós iha hela períodu kampaña eleitorál.

Nia hateten, iha nakslak ruma ne’ebé iha konstituisaun RDTL rasik hatuur ona no TL nia tradisaun ka kultura sempre hatudu dalan oinsá rezolve, nune’e labele uza beibeik violénsia, halo violénsia la kontribui ba dezenvolvimentu no bele prejúdika joven nia futuru.

“Se bele karik, ami fó hanoin kazu sira-ne’ebé hanesan horisehik akontese to’o balun kanek no uma balun aat, ida-ne’e lamentavél tebes. Husu ba joven, se bele haree didi’ak ida-ne’e kontribui ba dezenvolvimentu hakribit violénsia,” nia hateten.

Deskonfia akontesimentu ne’e mai hosi membru arte marisál, Deputada hosi bankada Governu ne’e hateten, arte marsiál nia papél ba dezenvolvimentu importante tanba ne’e VIII Governu Konstitusionál mós hakarak reativa maibé elementu ida ka rua nia mak sala, hanesan sidadaun ida loloos nia labele lori fali organizasaun nia naran.

“Se elementu hosi grupu arte marsiál sira-nia mak sala nia tenke responsabiliza ba ninia sala halo, la’ós organizasaun mak atu responsabilza de’it maibé nia mós tenke responsabiliza kriminál tanba ne’e krime ona,” nia dehan.

Nia dehan, klaru durante ita reativa arte marsiál ne’e, ita husu organizasaun sira atu bele kontrola sira-nia membru. Nune’e, komisaun B hein organizasaun sira bele kontrola tanba iha membru barak balun iha hanoin di’ak no balun hanoin ladi’ak, tanba ne’e presiza kontrolu organizasaun nian.

Deputada membru Komisaun B ne’e husu ba autoridade polisiál atu investiga didi’ak ba kazu konfrontu ne’e, nia kauza mai hosi ne’ebé no inklui iha akontesimentu ne’e rezultadu mós joven balun kanek no uma komunidade nian balun hetan estragu hodi prosesa tuir lei ne’ebé iha tanba ida-ne’e krime.

Deputada hosi bankada FRETILIN ne’e, hateten ho situasaun ne’ebé akontese presiza atuasaun Komandu PNTL nian hamutuk ho Ofisiál Polisiamentu Suku (OPS) iha suku ida-idak intensifika sira-nia vizibilidade seguransa.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!