AILEU, 11 maiu 2023 (TATOLI) – Lideransa Troika FRETILIN, Lere Anan Timur promete kuandu Fretilin ka’er ukun, programa prioridade mak tenke tau importánsia ba institusaun Falintil-Forsa Defeza Timor-Leste (F-FDTL) no Polísia Nasionál Timor-Leste (PNTL), atu dezenvolve instituisaun rua ne’e sai kualidade no profisionál liután.
“Durante ne’e instituisaun F-FDTL no PNTL seidauk dezenvolve di’ak, tanba ne’e mak kuandu FRETILIN ka’er ukun, programa prioridade dahuluk mak dezenvolvimentu forsa armada no polísia oinsá institusaun rua ne’e sai kualidade no profisionál”, Lere Anan Timur dehan perante komísiu partidu FRETILIN nian ne’ebé halao iha kampu futeball Sabaraka-Laran, Aileu Vila kinta ne’e.
Nia dehan, hanesan Eis-Xefe Estadu Maiór Jenerál Forsa Armada (F-FDTL) hatene kondisaun no situasaun institusaun F-FDTL no polísia nian.
“Forsa no polísia, Governu presiza dezenvolve ho di’ak iha kontestu apoia fasilidade tanba hanaesan”, nia afirma.
Lere hateten, iha pro no kontra kona-ba efetivu forsa defeza Timor-Leste nian ne’ebé hateten timor nasaun ki’ik, ninia efetivu forsa ne’e tenke oituan labele barak hanesan nasaun seluk.
“Maibé ha’u dehan, laos kestaun efetivu ne’e ki’ik ka bo’ot, ne’e ba ha’u laos problema, maibé problema ne’e mak responsablidade forsa nian ida ne’e mak importante. No iha ita-nia planu nasionál ne’e, efetivu forsa ne’e tenke kompleta 7.000”, nia adianta.
Lere Anan Timur hato’o nia preokupasaun kona-ba moris membru PNTL no F-FDTL bainhira pasa ba idade reforma.
“Ha’u dalaruma hasoru ha’u nia soldadu sira, ha’u sempre husu sira tantu militár no polísia, husu sira nian kondisaun, ha’u preokupa, tanba ha’u haree forsa no polísia balun sei moris ho kondisaun ne’ebé la di’ak, tanba ne’e kuandu Fretilin ka’er, programa prioridade ida mak trata vida militár no polísia ho digñu, nune’e sira ne’ebé sei ativu iha instituisaun rua ne’e bele dezenvolve instituisaun ho di’ak liután, sai lutu ba nasaun Timor-Leste no povu ida ne’e”, nia afirma.
Jornalista: Natalino Costa
Editór : Zezito Silva
