MANUFAHI, 11 maiu 2023 (TATOLI) – Komandante Polísia Nasionál Timor-Leste (PNTL) Munisípiu Manufahi Joni Viana das Regras, informa membru na’in neen mak naran tama iha lista ba reforma ne’ebé sei akontese iha 30 maiu agora.
“Komandu PNTL sei halo reforma ba membru iha fulan ida ne’e, entaun iha Manufahi membru na’in-neen mak naran tama iha lista”, Komandante dehan ba jornalista sira iha Manufahi, kinta ne’e.
Nia dehan, membru na’in-neen, idade liu ona 60, na’in lima ho kondisaun saúde di’ak, na’in ida mak kondisaun moras no hosi númeru ne’e mane hotu.
“Sira na’in-neen ne’e ho diviza ajente xefe hotu kedan, durante ne’e sira halo servisu iha Komandu PNTL Munisípiu Manufahi”, nia dehan.
Totál membru PNTL iha Munisípiu Manufahi hamutuk 128 no reforma tia na’in neen, membru efetivu hela de’in na’in-122.
Maske ho númeru ne’ebé menus, PNTL Manufahi nafatin utiliza rekursu ne’ebé iha hodi fó seguransa ba komunidade sira hotu iha Manufahi hodi garante pás no estabilidade.
Jornalista: Hortencio Sanchez
Editór : Zezito Silva
