MTCI apoiu $43.000 ba peregrinasaun loron Santuáriu Nasionál Aitara
MANATUTO, 11 maiu 2023 (TATOLI)—Adminsitrador postu administrativu Soibada, munisípiu Manatuto, Luis Gonzaga da Silva, hateten Ministériu Turizmu Komérsiu no Indústria (MTCI, sigla portugés) apoiu orsamentu kuaze rihun $43 ba peregrinasaun loron Santuário Nasionál Nossa Senhora de Aitara iha Soibada.
“Ami-nia turizmu relijiozu Santuário Aitara ne’ebé hetan apoiu hosi Ministériu Turizmu ho montante orsamentu kuaze rihun $43 hodi realiza atividade ba preparasaun loron nasionál peregrinasaun iha fulan-outubru nian iha Soibada,” nia hateten ba Agência Tatoli liuhosi telefónika, kinta ne’e.
Hosi montante orsamentu ne’e, nia dehan, atu halo preparasaun ba halo gazebo iha dalan, nune’e peregrina sira bele deskansa no konstrui mós haris fatin ida.
“Atividade turizmu nian agora daudaun ne’e atinje ona 40%, ne’ebé daudaun ne’e halo gazebo iha dalan ninin ba santuáriu Aitara nian depois uma hodi prepara aihan lokál sira, nune’e halo perignasaun karik bele uza deskansa no han produtu lokál ne’ebé komunidade sei prepara,” Luis Gonzaga dehan.
Nia dehan gazebo ho haris fatin ne’e sei halo permanente, nune’e tinan-tinan peregrina sira bele uza hodi halo peregrinasaun no daudaun ne’e komunidade mós hahú dada ahi iha dalan ninin sira.
“Objetivu halo gazebo oan ne’e atu udan, loron manas karik ita-nia peregrina sira mai vizita ne’e bele deskansa depois mak kontinua la’o ba to’o santuário Aitara nian,” nia hateten.
Jornalista : Osória Marques
Editór : Cancio Ximenes
