ATAÚRU, 11 maiu 2023 (TATOLI) – Partidu Demokrátiku (PD) kompromete sei promove turizmu ekolójiku hodi proteze rekursu naturál iha Ataúru.
Turizmu ekolójiku ka turizmu natureza eh eko-turizmu ne’e katak abordajen atividade turístika ne’ebé mak oferese liuhusi haree beleza naturál ka natureza nia furak sira.
“Ita presiza atu tau prioridade ba iha área potensiál sira iha setór turizmu ekolojia hodi prezerva ita-nia rekursu naturál hodi kontribui ba dezenvolvimentu iha setór kulináriu no seluktan,’’ Presidente Partidu PD, Mariano Assanami Sabino Lopes hato’o iha nia intervensaun polítiku iha suku Beloi, munisípiu Ataúru, kinta nee
Líder Partidu ne’e konsidera Ataúru nu’udar illa sagradu ne’ebé presiza promove nia natureza hodi dada komunidade lokál no internasionál sira, bele haree potensialidade rekursu natureza nian iha illa ne’e.
“Setór turizmu relijioza sei atrai turista relijiozu hodi halo sira-nia atividade peregrinasaun iha illa sagradu ida ne’e, no programa ne’e sei kontribui ba kresimentu ekonomia lokál no ekonomia nasionál,” nia akresenta.
Prezidente partidu ho sorteiu númeru 4 ne’e mós defende setór peska nu’udár setór potensiál, nune’e importante atu investe mós iha setór refere hodi diversifika enokomia rai laran.“Ita tenke investe iha setór potensiál hanesan peska. PD sei hadi’a portu Ataúru no sosa ró boot ho kapasidade 30 JP, hodi dezenvolve liu tán porodutu riku-soin iha tasi-laran”.
“Presiza hadi’a infraestrutura Estrada, mós eletrisidade hodi fornese koletividade entre suku sira, no mós liña eletrisidade tenke lakan regular,” nia hatutan.
Komisáriu Polítiku, relasaun esterna Partidu PD, Fransisku Mau Kura informa PD sei liuhusi programa turizmu PD sei promove Timor-Leste ba iha mundu.
“Ita sai ona membru ASEAN no mós ita presiza halo kooperasaun di’ak ho nasaun dezenvolvidu sira hanesan Austrália, Nova Zelándia, nasaun Eropa no nasaun Amérika no nasaun tomak iha mundu, tanba ne’e PD sei lori nasaun Timór ba Mundu no lori Mundu mai Timór, liuhusi programa prinsipál sira hanesan, Turizmu, Peska no seluktan,” Maukura hateten.
Ho programa xafe sira ne’e, maka Francisco Maukura, husu atu povu Ataúro tomak fó votu ba PD hodi bele realiza programa importante sira ne’e, hodi lori moris di’ak ba povu Ataúru.
Entretantu programa seluk ne’ebé PD promote sei implementa iha Ataúro maka, sei hadi’a infraestutura hanesan Estrada, no hadi’a Eletrisidade hodi fornese koletividade entre suku sira.
Jornalista: José Belarmino De Sá
Editora : Nelia Borges
