ERMERA, 11 maiu 2023 (TATOLI) – Partidu Liberta Povu Aileba (PLPA) kompromete sei proteze no prezerva lisan, uzu-kustume no tradisaun Timor oan sira nian hodi manten identidade orijinál ema Timoroan nian.
“Bainhira PLPA manan, ita tenke proteze ita-nia lisan, kustume no tradisaun Timoroan nian para hametin ita-nia tradisaun, atu nune’e ba futuru, ita-nia beioan sira bele kaer nafatin identidade nu’udar Timoroan,” Vise Sekretáriu Jerál PLPA, João Paulo Adito Pereira hato’o durante kampaña dialógu, iha suku Tokoluli, postu adminsitrativu Railako, munisípiu Ermera, kinta ne’e.
Nia dehan, polítika PLPA nian ba prezervasaun lisan no kustume Timór ho interese ida hakarak mantein identidade unika Timor-Leste.
João hato’o katak bainhira lisan ida prezerva ona mak item tradisionál sira hanesan Belak, Morten, Keke, Tais, Kaebauk no seluk bele prezerva mós.
“Proteze lisan no kustume ne’e signifika prezerva ita-nia atividade tradisionál sira hanesan sau-batar, feto-sá-umane, lia-mate no lia-moris no seluk tan,” líder ne’e dehan.
João akresenta katak prezervasaun lisan no uzu-kustume sai mós nu’udar matérial ka siénsia ba ema rai seluk atu aprende bainhira sira hakarak hatene moris kultura Timór nian. “Entaun, proteze no prezerva lisan no uzu-kustume Timor bele atrai mós turista sira mai Timor-Leste.”
“Se ita la prezerva ita-nia lisan ho didi’ak mak iha tempu ida, ita sei lakon ita-nia kultura hanesan nasaun seluk. Entaun, kultura seluk sei invade ita-nia kultura. Ida ne’e PLPA nia polítika hodi asegura interese nasionál,” nia esplika.
João dehan bainhira PLPA manan, governu sei tau osan maka’as atu hadi’a uma lisan ne’ebé mak aat no halo uma-lisan ne’ebé mak persiza halo foun.
“Uma-lisan ne’ebé mak sira na’in rasik bele halo la buat ida, maibé ba sira ne’ebé mak laiha kapasidade atu halo governu tenke apoiu,” nia salienta.
Jornalista: Filomeno Martins
Editora: Nelia Borges
