DILI, 11 maiu 2023 (TATOLI)–Komandante Polísia Nasionál Timor-Leste (PNTL) munisípiu Dili, Superintendente Xefe Polísia Natercia Eufrasia Soares Martins, informa, Polísia kaptura suspeitu na’in-rua hosi kazu konfrontasaun iha suku Bairu Pité, postu administrativu Dom Aleixo, munisípiu Dili.
Kazu ne’e akontese iha kuarta (10/05) lorokraik entre grupu arte-marsiál no grupu arte rituál. Konfrontu ne’e mosu bainhira grupu arte-marsiál balun halibur malu hodi ba hakoi sira-nia maluk balun ne’ebé mate, hosi ida-ne’e maka mosu konfrontasaun entre parte rua.
“Konfrontu entre grupu organizaun rua ne’ebé akontese iha kuarta lorokraik rezulta ema sira ne’ebé la tama iha problema ne’e tenke hetan sofre hanesan sira-nia uma hetan estragu, inklui transporte no negósiu kiik, konflitu mosu sempre iha ninia konsikuénsia, dala barak konsikuénsia ne’e ba ema inosente. Hosi konfrontu ne’e kaer na’in-rua iha terrenu,” Komandante PNTL Dili hateten hafoin partisipa iha diálogu ho Autoridade lokál iha postu administrativu Vera Cruz, kinta ne’e.
Notísia relevante : Kazu konfrontu iha Becora, PNTL asegura joven na’in-tolu
Nia dehan, hafoin ekipa seguransa kaer suspeitu na’in-rua, Polísia Investigasaun Kriminál halo de’it identifikasaun ba suspeitu ida tanba prova la sufisiente atu justifika katak nia nu’udar suspeitu, nune’e tenke liberta.
“Suspeitu seluk ne’e kaer tanba haree nia halo hela aktu krime, ne’ebé detein nia ba sela durante oras 72 depois submete ba interrogatóriu dahuluk maibé tuir video CCTV ne’ebé mak iha, Komandu sei haree fali hodi identifika depois ema sira ne’e ita sei halo xamada tanba gravasaun lubuk mak ami iha,” nia klarifika.
Bazeia ba relatóriu katak, hosi konfrontu ne’e laiha ema ida mak kanek maibé iha komunidade nia sasán mak hetan estragu.
“Na’in ba sasán estragu sira ne’e balun hato’o ona keixa no barak mak seidauk, maibé ami hasai fotografia hodi hein tan keixa, maibé kuandu iha ona aktu krime signifika iha suspeitu iha mós vítima, ne’ebé sasán sira ne’e hotu tau iha akta no aprezenta ba Ministériu Públiku,” Xefe Polísia Natercia Eufrasia esplika.
Tuir nia, konfrontu ne’ebé akontese iha kuarta kalan Polísia identifika ninia motivu ne’e la mai hosi polítiku maibé mai hosi grupu arte-marsiál no arte-rituál.
“Iha kinta dader ne’e ami komunika ona Komisaun Reguladór Arte Marsiál (KRAM) atubele rezolve situasaun ida-ne’e atu labele akontese beibeik, no kompeténsia KRAM atu komunika ho líder grupu rua ne’e hodi haree liu ba sansaun administrativa maibé krime ninia prosedimentu ne’e hateten klaru katak bainhira iha aktu krime ruma mosu sempre iha autór, vítima, sasin no evidénsia, ida-ne’e halibur hamutuk hodi aprezenta ba na’in ba prosesu depois ita hein desizaun hosi sira, ne’ebé Polísia agora serbisu maka’as loos atu identifika sasán sira ne’e,” nia dehan.
Jornalista : Antónia Gusmão
Editora : Julia Chatarina
