AILEU, 11 maiu 2023 (TATOLI) – Prezidente Repúblika José Ramos Horta, akompaña hosi Embaixadór Korea iha Timor-Leste Shin Mantek fó apoiu ba labarik nain 50-resin ne’ebé iha Centro das Crianças de Maria, ne’ebé lokalizadu iha Suku Lahaek Postu Administrativu Aileu Vila Munisípiu Aileu.
Prezidente Repúblika José Ramos Horta, hateten apoiu ne’ebé iha mak sasan balun ba alin sira iha Centro das Crianças de Maria. ne’ebé lokaliza iha Suku Lahaek.
“Ha’u lori Embaixadór Korea mai, tanba Embaixadór mak koalia ho kompaña Samsung, nudar kompaña bo’ot iha Korea, hodi oferese roupa, sapatu no nesesidade sira seluk hodi mai fó apoia ita-nia alin sira iha ne’e, hodi bele uza ba sira-nia nesesidade loroloron”, José Ramos Horta hateten iha nia intervesaun bainhira fó apoiu ba ba labarik nain 50-resin.
Xefe Estadu ne’e hatutan, apoiu ne’e la’os mai hosi de’it Emabixada Korea, maibé balun mós mai hosi Prezidente Repúblika.
“Apoiu ida ne’e balun mós mai hosi Prezidensia Repúblika, atu apoiu netik nesesidade ba ita-nia alin sira iha ne’e, hodi bele uza ba sira-nia nesesidade loroloron”, nia afirma.
Iha fatin hanesan, responsavél Centro das Crianças de Maria (CCM) Leonora Guterres, hateten prezensa Prezidente Repúblika José Ramos Horta ho nia ekipa iha CCM ne’e objetivu atu fó ajuda de’it nesesidade balun.
Nia esplika, vizita ida ne’e, nudar vontade mai hosi Xefe Estadu rasik, ne’ebé mak nia rasik hakarak atu vizita mai CCM.
Tanba, iha semana kotuk bainhira Prezidente Repúblika ho ekipa fila hosi vizita ida iha Manufahi, entaun liu iha dalan haree alin sira CCM lao hela iha estrada. Entaun Prezidente Repúblika ho nia karreta para no bolu alin sira hodi konversa ho sira no husu hakarak halo vizita mai iha CCM no fó buat balun.
“Tanba ne’e mak ohin Prezidente Repúblika, molok atu ba vizita grupu ida iha Manufahi, entaun liu tiha mai vizita ami iha ne’e”, Leonora Guterres hateten.
Centro das Crianças de Maria (CCM) harii 2016, hosi Padre Mozinho Lopes. Iha sentru ne’e akumula labarik hamutuk 50-resin, ne’ebé mai hosi munisípiu 13 inklui RAEAO.
“Iha sentru ne’e ami iha difikuldade liuliu ba ai-han, maibé ho apoiu hosi Prezidente Repúblika ami sente sufisiente, tanba ajuda tebes ami, tulun tebes ami iha momentu sira hanesan ne’e”, Leonora Guterres dehan.
Nia parte, gradese tebes ho Presenza Xefe Estadu hamutuk ho Embaixadór Korea iha Timor-Leste bele hiit aan mai iha CCM.
“Ami sente haksolok no kontente loos, tanba Prezidente Repúblika rasik vizita ami-nia fatin simples ida ne’e. Maske loron hirak ami hasoru de’it ho Prezidente Repúbika iha dalan, maibé Prezidente nian insiativa no vontade rasik, bele mai vizita ami nian fatin simples ida ne’e”, nia agradese.
Jornalista: Natalino Costa
Editór : Zezito Silva
