UNDP-IOB fó formasaun multimedia ba FP iha Manufahi
MANUFAHI, 11 maiu 2023 (TATOLI) – Organizasaun Programa Nasaun Unida ba Dezenvolvementu (UNDP-sigla ingles) parseria ho Universidade Institute of Busines (IOB) fó formasaun Traning of Trainers (TOT) ba Funsionáriu Públiku iha Munisípiu Manufahi atu hasa’e koñesimentu kona-ba utilizasaun ba multimedia nian iha parte media online.
Formasaun ida ne’e hanesan faze ida atu prepara FP sira bainhira dezentralizasaun hala’o iha munisípiu ida-idak, FP sira bele iha ona koñesimentu klean kona-ba utilizasaun ba multimedia iha media online nian.
“Dadaun ne’e UNDP halo parseiru ho IOB durante tinan ida ona ami hala’o atividade ne’e kobre ona ba munisípiu sia ona atu fasilita formasaun ba ita-nia Funsionáriu Públiku sira kona-ba asesu ba multimedia nian atu funsionáriu sira iha munisípiu no postu administrativu sira, bainhira dezentralizasaun realiza ita-nia funsionáriu sira bele iha ona koñesimentu klean ba multimedia nian”, Koordenadór projetu desentralizasaun UNDP Munisípiu Manufahi no Ainaro Aureliano Valente Araujo Belo Magno dehan ba jornalista sira iha edifísiu Administrasaun Munisípiu Manufahi, kinta ne’e.
Nia dehan, projetu ne’e realiza tanba UNDP hamutuk no Uniaun Europeia (UE) iha Timor-Leste halo kooperasaun ho Ministériu Administrasaun Estatál (MAE) atu formasaun ba FP hotu ne’ebé iha MAE nia okos.
Formasaun ne’e fó uluk ba FP Administrasaun Munisípiu Manufahi nian na’in neen mak hetan uluk oportunidade ne’e bainhira hatene ona mak sira sai fali hanesan formadór ba FP sira seluk iha Munisípiu Manufahi.
Iha okaziaun ne’e, Tékniku ne’ebé fó formasaun ba FP sira hosi IOB João Antonio Marques hatete, formasaun ne’e hanesan faze ida mós oinsa atu dezenvolve kapasidade FP sira nian kona-ba tékniku multimedia nian.
“Funsionáriu Públiku sira importante tebes atu tuir formasaun ne’e atu eleva liután sira nia kapasidade atu utiliza ba media online, tanba agora ne’e era globalizasaun tanba ba oin kuandu dezentralizasaun la’o ona buat hotu sei servisu ho maneira online de’it, ne’e mak programa UNDP nian ne’e kapas tebes”, nia esplika.
Formasaun ba FP na’in neen iha Munisípiu Manufahi ne’e durante loron rua, hahú horseik no termina ona ohin, ba oin formandu sira sei aplika fali materia ne’ebé sira hetan ba FP seluk ne’ebé seidauk hatene kona-ba utilizasaun ba media online no multimedia nian.
Projetu ne’e hala’o ona iha munisípiu hamutuk 13 la Inklui Rejiaun Administrativu Espesial Oe-Cusse Ambeno (RAEOA) tanba iha ne’ebá laiha sanak UNDP nian iha ne’ebá maibé iha tempu besik UNDP sei esforsu atu ba fó mós formasaun iha RAEOA.
Jornalista: Hortencio Sanchez
Editór : Zezito Silva
