Aban, STAE-CNE Manatuto hahú halo verifikasaun ba buletin votu
MANATUTO, 12 maiu 2023 (TATOLI)—Diretór Sekretariadu Tékniku Administrasaun Eleitorál (STAE), munisípiu Manatuto, Mariano Natalino Soares hateten, sábadu (13 maiu 2023) ne’e, STAE ho Komisaun Nasionál Eleisaun (CNE) hahú halo verifikasaun ba buletin votu.
“Aban, STAE ho CNE ho fiskál partidu polítika sira-nian hahú halo verifikasaun ba buletin votu ne’ebé ohin ita simu hosi nasionál, ita presiza verifika buletin votu,” Mariano Natalino Soares hateten ba Tatoli, liuhosi telefónika, ohin.
Ba munisípiu Manatuto, nia dehan, STAE nasionál entrega livru ba bulletin votu hamutuk 832 ho kaixa hamutuk ualu, kompostu hosi kaixa neen (6) boot no rua (2) seluk kaixa kiik.
“Livru buletin votu ne’ebé ohin ita simu ne’e hamutuk 832 no ida-ne’e sufisiente ona ba sentru votasaun 83 no estasaun votasaun 98 iha Manatuto,” nia hateten.
Iha 20 maiu agora, tuir nia, sei transporta materiál sensitivu no naun sensitivu ba sentru no estasaun votasaun sira iha postu administrativu sira iha Manatuto.
“Transportasaun ne’e, ita halo simultánea iha territóriu nasionál,” nia dehan.
Responsavél ne’e hatutan, eleitór ne’ebé rejistu iha 2023 ne’e aumenta ba 36.000-resin, no hosi númeru ne’e iha postu administrativu Barique iha eleitór 4.544, Laclo 5.896, Laclubar iha 9.352, Laleia hamutuk 3.075, Manatuto Vila iha 10.568 no postu administrativu Soibada iha 2.564.
Jornalista : Osória Marques
Editór : Cancio Ximenes
