Aban, STAE Liquiça hahú halo pakote ba materiál ElPar 2023
LIQUIÇA, 12 maiu 2023 (TATOLI)– Sekretariadu Tekniku Administrasaun Eleitor (STAE) Munisípiu Liquiça hahu aban komesa halo pakote ba material sensitivu no la sensitivu sira ba Eleisaun Parlamentar (ElPar) molok transporta ba sentru votasaun sira iha loron 20 maiu 2023.
Diretór STAE Munisípiu Liquiça, Mario dos Santos Martins hateten, ohin loron SATE nasional hahu ona distribui material sensitivu no la sensitivu ba munisipiu hotu iklui RAEOA – Oecusse.
“Mai iha Liquiça nian iha kaixa 11, no livru iha 1182. Ida ne’e kobre ona ba sentru votasaun 85 no Estasaun Votu hamutuk 106,” Mario dos Santos Martins dehan iha SATE Liquiça, sesta ne’e.
Nia esplika, hahu ohin ba oin ekipa STAE sei mantein iha edifisiu hamutuk ho ekipa seguransa husi PNTL (Polisia Nasional Timor-Leste) hodi hamutuk asegura material ElPar nian molok transporta ba sentru votasaun sira.
“Kuandu materiál to’o mia hahú ohin seguransa husi PNTL maximu no aban komesa halo ona pakote ba material la sensitivu, no bainhira remata ami sei konvida fiskais partidu politiku sira no segunda mai ita halo ona pakote ba material sensitivu sira,” nia deklara.
Mario dos Santos Martins dehan STAE Liquiça mos prepara ona fatin ba sentru votasaun walu (8) ne’ebé labele hetan fatin publiku hodi sai fatin votasaun liu husi prepara kalen, ai no materiál sira seluk.
“Sentru votasaun foun laiha fasilidade publiku ne’e iha walu (8) no sentru sira nee atu dada lona maibe tanba natureza nune’e ami sosa ona kalen sira hodi lori ba sentru no ita nia brigada ho autoridade suku servisu hamutuk hodi hari’i sentru votasaun,” Diretór ne’e hateten.
Sentru Votasaun walu (8) ne’ebé la iha fatin publiku kompostu husi suku sira hanesan Metagou (2), Hatuquesi (2), Dato (1), Darulete (1), Leorema (1) no Acumano (1).
Munisípiu Liquiça iha eleitor hamutuk 53,084 ne’ebé kompostu husi Postu Adminitrativu tolu (3), no Suku 23 ne’ebé sei halo votasaun iha sentru votasaun 85.
Jornalista: Cidalia Fátima
Editora : Armandina Moniz
