CNE Manatuto identifika profesór-pesoál saúde partisipa kampaña FRETILIN
MANATUTO, 12 maiu 2023 (TATOLI)—Diretór Komisaun Nasionál Eleisaun (CNE) munisípiu Manatuto, Paulino Soares, hateten ekipa CNE identifika funsionáriu públiku balun partisipa tuir atividade kampaña partidu FRETILIN nian iha Manatuto Vila.
Notísia Relevante: FRETILIN prioriza kria kondisaun ba manorin sira eleva kualidade edukasaun
“Tuir ami-nia observasaun ba kampañia Partidu FRETILIN nian hahú to’o agora ne’e, CNE Manatuto identifika iha koron servisu ne’e funsionáriu sira liu-liu profesór no pesoál saúde sira balun hosi postu Laclubar no Soibada nian,” Paulino Soares hateten ba Agência Tatoli, bainhira hala’o observasaun ba kampañia Partidu FRETILIN nian.
Nia dehan, tuir loloos ne’e funsionáriu públiku sira labele tuir kampaña eleitorál tanba loron servisu tenke hala’o sira-nia kna’ar hanesan servidór públiku.
Aleinde ne’e, nia dehan, kona-ba karreta ka patrimóniu Estadu ne’e CNE Manatuto identifika karreta Estadu rua no karreta Parlamentu Nasionál iha rua mós, no ida-ne’e CNE anota no tau iha relatóriu nune’e bele subemte ba nasionál.
Diretór CNE Manatuto ne’e hateten, CNE hasai ona dokumentu ka hasai foto karreta Estadu (Governu) no karreta ho marka PN nian.
“Ita iha dadus kompletu kona-ba patrimóniu Estadu nian no hein subemte de’it relatóriu ba CNE Nasionál,” nia dehan.
Nia hatutan, envolmentu labarik iha kampañia ne’e ladun iha maibé lori militant no simpatizante FRETILIN hosi postu administrativu mak barak loos no ida-ne’e CNE anota hotu ona.
Jornalista : Osória Marques
Editór : Cancio Ximenes
