DILI, 12 maiu 2023 (TATOLI) – Xefe Estadu-Maiór Jenerál FALINTIL-Forsa Defeza Timor-Leste (F-FDTL), Tanente-Jenerál Falur Rate Laek, husu ba líder partidu polítiku sira tenke iha vizaun ba futuru, nune’e lori nasaun ne’e ba moris di’ak.
“Ita hotu hein katak ita-nia líder hosi organizasaun sira, hosi partidu polítiku, instituisaun relijioza no sosiedade sivíl sira tenke vizionáriu ka sai indikadór ba povu no tenke hatene tranzmite ba povu sira esperansa no ho konfiansa katak ita-nia futuru sei sai di’ak liu”, Falur Rate Laek hatete iha Tasi Tolu, sesta ne’e.
Nune’e, nia husu ba líder sira hotu ne’ebé harii partidu polítiku tenke hamutuk, nune’e bele hametin liután konfiansa ba povu hodi bele lori nasaun ne’e ba prosperidade tuir mehi ne’ebé maka eroi sira husik hela ba nasaun no ba nia emar sira.
Nia haktuir katak líder sira ne’ebé mak lori ona nasaun no povu ne’e ba libertasaun hatene hatuur-aan. “Sira hatudu-aan hanesan ema inspiradór hodi motiva ema sira seluk atu tuir sira ho aten-barani atubele hasoru difikuldade ne’ebé todan liu hotu”.
“Ita-nia líder sira ne’e hatene dada ema, halo ema hatene respeita. Ezemplu sira hanesan ne’e maka ita hakarak atu aplika fali tan dala ida iha polítika no asaun loroloron nian”, afirma.
Falur Rate Laek afirma katak povu maduru ona iha polítika sira maske balun seidauk komprende didi’ak direitu liberdade hodi halo asaun oioin atu atinje sira-nia hakarak, maibé ida ne’e la fó impaktu atu destroi nasaun ne’e.
“Hahalok sira hanesan ne’e sai mós lisaun boot ida ba líder sira iha nasaun ne’e atu fó liman ba malu hodi dezenvolve país ba moris di’ak no povu bele moris hakmatek”, salienta.
Jornalista: Tomé Amado
Editora: Maria Auxiliadora
