COVALIMA, 12 maiu 2023 (TATOLI)–Komandante PNTL munisípiu Covalima, Polísia Basílio de Jesus hateten, grupu organizadu la eziste iha Covalima maibé pesoál balun mak hemu tua para transporte privadu ne’ebé liuhosi auto estrada iha postu administrativu Zumalai, munisípiu Covalima.
“Ha’u hanoin grupu organizadu la eziste iha Covalima maibé individu balun dala ruma hemu tua lanu, tanba problema seluk hakat mai auto estrada hodi halo auto stop ba motorizada balun hodi lansa liufuan ita-boot mai hosi PSHT ka lae, ne’e ita bele analiza,” Basilio de Jesus hateten ba jornalista sira, iha Kampung Baru, Covalima, sesta ne’e.
Komandante ne’e rekoñese, individu balun ne’epara para motor no karreta iha parte auto estrada postu administrativu Zumalai nian foin lalais-ne’e, maibé ida-ne’e labele konsidera grupu ida atu labele estraga, destroi no halo impedimentu ba atividade, tanba polísia mak sai autór ba seguransa.
“Ita hotu iha Covalima, polísia mak sai autór ba seguransa bainhira grupu deskoñesidu halo asaun iha parte auto estrada Zumalai akontese foin lalais ne’e, ida-ne’e labele konsidera grupu ida atu labele estraga, destroi no halo impedimentu ba atividade,” nia dehan.
Maske individu balun, tanba odiu vingansa privadu hapara movimentu transporte públiku balun hodi tenta lansa linguajen mai husu organizasaun PSHT ka lae, ida-ne’e halo públiku sira pániku.
“Ho situasaun individu balun halo auto stop ba motor no karreta ne’e, nia husu ba públiku labele pániku ho buat sira-ne’e tanba ita sei moris problema sempre iha. Maibé, labele foti problema sai ameasa estabilidade ida ba iha Covalima, tanba polísia sei la fó espasu grupu sira atu tenta destroi estabilidade,” nia dehan.
Tuir dadus ne’ebé Agência Tatoli asesu hosi membru Polísia Nasionál Timor-Leste (PNTL), iha Munisípiu Covalima hamutuk na’in-149 hodi garante seguransa ba komunidade.
Jornalista : Celestina Teles
Editór : Cancio Ximenes
