Implementasaun PMOPA iha Fatululik no Fohorem finaliza ona
COVALIMA, 12 maiu 2023 (TATOLI)–Reprezentante administradór munisípiu Covalima, Francisco de Jesus Alves, hateten implementasaun Programa Mão de Obra Postu Administrativu (PMOPA) faze dahuluk iha postu administrativu Futululik no Fohorem finaliza ona.
“Implementasaun Programa Mão de Obra Postu Administrativu (PMOPA) faze dahuluk iha postu administrativu Fohorem no Fatululik finaliza ona. Ita hatene balun kontinua la’o hela hanesan postu Fatumea tanba klima mak la permite fó oportunidade organiza atividade,” Francisco de Jesus Alves hateten ba Agência Tatoli, iha Kampung Baru, sesta ne’e.
Faze dahuluk nia ne’e, nia dehan, iha postu administrativu Fatumea foin lalais hala’o lansamentu tarde uitoan tanba liga ba situasaun klima ne’ebé la fó oportunidade ba administradór atu bele organiza servisu traballadór sira iha terrenu.
“Ita foin lalais foin hala’o lansamentu tarde uitoan tanba liga ho situasaun klima ne’ebé mak ladún fó oportunidade ba ita-nia traballadór no administradór postu administrativu atu bele organiza hodi servisu iha terrenu,” nia dehan.
Ho nune’e, bazeia ba matadalan Programa Mão de Abra Postu Administrativu (PMOPA) nia implementasaun durante loron 20, ne’ebé traballadór la’ós ema-ne’ebé hanesan maibé halo rotasaun kada períodu balun servisu loron lima ka 10 hafoin kontinua ho grupu balun, nune’e komunidade hotu bele hetan oportunidade partisipa iha dezenvolvimentu iha sira-nia rain rasik.
Totál orsamentu ba implementasaun PMOPA kada tinan rihun $100, nia implementasaun fazeadamente ba faze dahuluk implementa 50% hafoin ramata implementa ba faze daruak 50% hodi kompleta tan 50%.
Antes ne’e, administradór postu administrativu Fatumea, Geraldo Orleans, hateten implementasaun Programa Mão de Obra Postu Administrativu (PMOPA) iha postu administrativu Fatumea, munisípiu Covalima ba tinan 2023 prioridade halo reflorestasaun.
Notísia Relevante: Implementasaun PMOPA iha Fatumea prioriza halo reflorestasaun
Jornalista : Celestina Teles
Editór : Cancio Ximenes
