ATAÚRU, 12 maiu 2023 (TATOLI)- Partido Democrata Cristão (PDC), promete halakon lei pensaun vitalisia bainhira hetan votu konfiansa maioria husi povu hodi hetan Asentu Parlamentár.
Presidente PDC, Francisco De Araújo hateten, Lei refere fó de’it priviléjiu ba ukun-na’in sira, tanba ne’e PDC halakon lei ne’e, ho objetivu atu governu la bele gasta osan barak ba selu de’it ba deputadu sira ne’ebé simu ona osan bo’ot no sai reprezentante povu iha Parlamentu Nasionál.
“PDC kontra lei pensaun vitalísia tanba Timor-Leste gastu osan bo’ot kada tinan hodi fó de’it priviléjiu ba grupu balun, maibé povu kontinua moris ki’ak no halerik nafatin. Ita hakarak osan ba pensaun vitálisia bele uza ba hadi’a infraestrutura ba setór importante sira hanesan, turizmu, peska no setór seluk importante iha munisípiu Ataúru no mós iha munisípiu sira seluk,’’ Prezidente PDC, Francisco de Araújo hateten iha nia intervensaun polítika iha suku Maquili, Munisípiu Ataúro, sesta nee.
Líder partidu ne’e deklara PDC hakarak governu tenke investe makas iha setór infraestrutura iha munisípiu Ataúru tanba Illa Ataúru nu’udar fatin espesiál ida iha setór turizmu nian, iha biodiversidade furak barak iha tasi-laran no mós rai leten.
“Ita presiza dezenvolve di’ak liu tán iha setór turizmu, hodi atrai turista internasionál no doméstiku bele rekolla reseita hodi diversifika ekonomia no bele mós kontribui ba kofre estadu,’’ nia esplika
Atu garantia dezenvolvimentu iha rai laran, PDC mós sei implementa nia programa xave sira hanesan: investe iha setór peska, hodi atrai emprezáriu internasionál sira atu bele kria sentru indústria peska, hodi bele loke kampu serbisu ba komunidade Ataúru, Hadi’a portu Ataúru hodi sosa ró bo’ot hodi bele mai atraka iha portu ne’e, no foku ba programa infraestrutura hadi’a estrada, eletrisidade no bee moos.
Jornalista: José Belarmino De Sá
Editora: Nelia Borges
