PLP kontinua esforsu hodi halakon Lei Pensaun vitalisia
ATAÚRU, 12 maiu 2023 (TATOLI)– Partidu Libertasaun Populár (PLP) promote sei esforsu halakon Lei pensaun vitalisia, iha Timor-Leste.
Kompromisiu Polítiku ne’e hato’o husi Vise prezidente komisaun polítiku Nasionál Partidu PLP, Francisco Vasconcelos, iha kampaña eleitóral iha suku, Beloi Munisípiu Ataúro, sesta ne’e.
Atu realiza esforsu ne’e, Vise Prezidente ne’e husu ba Povu Ataúro fó votu konfiansa ba partidu PLP iha Eleisaun Parlamentár ne’ebé sei mai.
“PLP ho númeru sortie 3 ne’e, nafatin luta iha parlamentu hodi halakon tiha pensaun vitalisia ne’ebé benefísiu de’it ba parte balun no povu mak terus no halerik nafatin. Fó votu konfiansa ba partidu PLP hodi bele hetan kadeira 34 iha Parlamentu Nasionál nune’e bele halakon tiha Lei pensaun vitalisia iha rai doben Timor-Leste,” Vansconcelos hateten ba Militante no Simpatizante PLP iha Munisípiu Ataúro.
Vise Prezidente Komisaun PLP ne’e mós enfaze katak PLP ne’ebé lidera oitavu governu esforsu ona hadi’a povu nia moris liuhusi programa sira hanesan harii ‘uma naroman ba povu’, programa Cesta bázika, no subsídiu $200 ba komunidade tomak.
“PLP halo ona esforsu tomak hodi hadi’a povu nia kondisaun moris, liuhusi harii “uma naroman ba povu” ne’ebé benefísiu ba komunidade vulnerável sira , Ita mós implementa ona program sesta bázika, no subsídiu $200 hodi benefísiu ba komunidade Timor-Laran tomak,” nia hateten.
Nune’e mós Vise Presidente partidu PLP, Maria Angelina Sarmento, reforsa katak, PLP sei kontinua implementa program desentralizasaun no podér lokál atu ema hotu bele dezenvolve sira-nia munisípiu rasik.
“Ita hakarak povu husi munisípiu ida-ida tenke fila ba sira-nia fatin, hodi dezenvolve sira-nia munisípiu rasik, atu kria kampu serbisu hodi kontribui ba dezenvolvimentu lokál nian,’’ Vise Presidente PLP, Maria Angelina Sarmento hato’o iha nia intervensaun polítiku iha kampaña komísiu iha suku, Beloi, sesta nee.
Nia dehan, PLP transforma ona postu Adiministrativu Ataúru sai munisípiu ida ne’ebé fó podér lokál ba ema Ataúru oan rasik atu bele dezenvolve programa sira benefísiu ba povu Ataúru.
PLP aprova ona orsamentu ho totál $.100.000 kada tinan ba munisípiu ida-ida hodi halo jestaun administrasaun no mós hodi implementa program munisípiu liu husi podér lokál.
“Ita iha komitmentu hodi lidera nasaun ida ne’e durante tinan hira ona, no sei kontinua ba oin hodi implante programa ne’ebé bele reflete duni ba komunidade nia moris. Nune’e prgrama desentralizasaun póder lokál presiza tebes implenta iha munisípiu sira, liu-liu iha munisípiu Ataúru, “nia hateten.
Joralista: José Belarmino de Sa
Editora: Nelia Borges
