Karreta transporta materiál eleisaun ba Covalima hetan insidente iha Dare
COVALIMA, 13 maiu 2023 (TATOLI)–Reprezentante administradór munisípiu Covalima, Francisco de Jesus Alves, hateten karreta Estadu ho xapa mátrikula 03.129 G ne’ebé transporta materiál sensitivu no la’ós sensitivu hosi Dili ba Covalima hetan insidente iha Dare, Mulu, Ainaro.
Notísia Relevante: STAE distribui materiál sensitivu no la sensitivu ba munisípiu no diáspora
Nia dehan, ida-ne’e konsidera insidente tanba karreta ne’e derrepente travaaun sama la han, nune’e karreta ne’e konsege xoke fali karreta diretor STAE Covalima nian hosi kotuk.
“Iha kinta (11 maiu 2023), ami lubuk hamutuk ho diretór STAE, komandante operasaun PNTL no administradór postu administrativu Covalima, ami dezloka ba Dili hodi partisipa abertura lansamentu entrega materiál eleisaun ba munisípiu hotu no estranjeiru. Hosi Dili atu lori mai iha munisípiu covalima, iha sesta (12/05/2023) hamutuk veiukulu 13 aumenta ho komandante PNTL munisípiu hamutuk kareta 14, hosi númeru ne’e karreta ida tula materiál sensitivuno la’ós sensitivu mak hetan insidente iha Dare,” reprezentante administradór Munisípiu Covalima, Francisco de Jesus Alves, hato’o klarifikasaun ba fiskál partidu polítiku no ba observadór sira iha salaun STAE Covalima, Kampung Baru, sábadu ne’e.
Hafoin akontese insidente, autoridade preokupa administradór postu Suai ho nia motorista nia vida no mós tula materiál sensitivu iha karreta laran, tanba karreta Estadu sei bele hadi’a maibé ema no tula materiál sensitivu reponsabilidade boot.
Ho nune’e, nia dehan, tanba materiál sensitivu mak sei determina futuru nasaun no sei determina hamosu Governu ne’ebé responsabiliza atu halo dezenvolvimentu tinan lima mai.
Aleinde ne’e, autoridade Covalima mós orienta kedas STAE, CNE no PNTL atu halo dokumentasaun materiál sensitivu sira-ne’ebé monu halo kaixa nakles no balun monu sai tanba hetan insidente.
“Akontese insidente, autoridade Covalima preokupa ita-nia maluk nain-rua (2) nia vida no materiál sensitivu iha karreta laran. Maske karreta estadu hetan insidente maibé karreta sei bele hadi’a, ema ho materiál sensitvu reponsabilidade boot ekipa sira transporta materiál mai,” nia dehan.
Autoridade halo justifikasaun verbal sei halo justifikasaun liuhuoi eskrita ba partidu polítiku sira no ba entidade hotu, tanba insidente akontese laiha planu kesengajaan hodi hamosu kecurangan iha prosesu hotu.
“Ami sei hato’o relatóriu, sei aprezenta ba públiku nafatin fó konfiansa mai ami hanesan autoridade lokál. STAE no CNE, ami garante prosesu hotu sei la’o ho justu no transparánsia, laiha manipulasaun tanba ami sei servisu tuir regra,” nia dehan.
Komandante eskuadra postu administrativu Suai, munisípiu Covalima, Inpetór xefe Polísia Juaquim da Costa, klarifika transporta materiál sensitivu ho la’ós sensitivu hosi Dili mai iha Covalima ne’ebé hetan insidente ho naturál la’os ema ruma akontese la’e, maibé tanba kondisaun karreta ladún di’ak.
“Hafoin akontese, ami parte seguransa hodi halo asaun polísia, insidente akontese tanba la’ós fatór hosi ema ruma maibé insidente mosu ho natural, ita la sente tanba kondisaun karreta uza entaun hetan konsekuénsia,” nia dehan.
Durante akontese, insidente hosi parte seguransa fó apoiu no hosi asegura materiál sensitivu ho la’ós sensitivu hodi hasai mos dokumentasaun no sasán ne’e tula fali iha karreta seluk hodi lori mai to’o iha munisípiu Covalima.
Jornalista : Celestina Teles
Editór : Cancio Ximenes
