PUDD sei lori prioridade lima ba Liquiça
LIQUIÇA, 13 maiu 2023 (TATOLI)— Partidu Unidade Desenvolvimentu Demokrátiku (PUDD) ho númeru sorteiu walu (8) fiar sei lori prioridade lima ba Munisípiu Liquiça bainhira hetan fiar husi povu hodi manaan iha Eleisaun Parlamentar (ElPar) tinan 2023.
“Programa prioridade Liquiça mak ha’u foti iha Agrikultura, Peska, Estrada Area Remotas no Be’e Moos inklui Oportunidade Servisu Juventude,” Prezidente Partidu PUDD, Silvestre Sufa dehan liu husi mini kampaña iha Munisípiu Liquiça, sabádu ne’e.
Silvestre Sufa esplika ba iha setor agrikultura, Liquiça koñesidu ho Kafe liu-liu ba komunidade iha aréa foho tanba dadauk ne’e produtividade kafe menus tebes no sei fó subsidiu ba agrikultor hodi halo rezenarasaun ba kafe hun sira ne’ebé tuan.
Nia nota durante ne’e nesesidade kafe iha rai laran mos sa’e ba bebeik maibé agrikultor sira labele hatan ba nesesidade sira maske kafe nia folin diak tebes iha mundu internasional.
“Ita sei lobi nafatin ba mundu tomak para atu gaña kompaña barak liu hodi hola ita nia kafe ho nune’e folin bele kompete no benefisiu ba povu, ita mos presiza halo koperativa ba Cacao no Baunila,” nia esplika.
Alende ne’e ba area peska nian presiza fasilita formasaun ba peskador sira nune’e bele iha koñesimentu diak liu sai peskador professional inklui fasilita sira nia servisu.
Nia dehan, hare’e mos ba juventude sira nian governu labele haruka deit sira ba servisu iha rai liur maibe tenke fasilita fali sira ne’ebé fila ona atu bele sai empregador (enterpreuner) hodi hamoris ekonomia iha Timor-Leste.
Jornalista : Cidalia Fátima
Editora : Armandina Moniz
