Ataúru, 13 Maiu 2023 (TATOLI)- Partidu União Democrático Timorense (UDT) sei tau importánsia ba programa importante tolu mak hanesan Turizmu, Perka no Bee moos.
Sekretáriu Ezekutivu UDT munisípiu Dili, Angelino Das Neves, hateten implementasaun programa tolu ne’e hodi garante rendimentu komunidade Ataúro sira nian.
“Ita hatene katak komunidade Ataúru nia rendimentu mak mai husi setór turizmu no peska. UDT hakarak apoiu kapasitasaun kona-ba setór Turizmu, atu ita bele asegura dezenvolvimentu turizmu hodi atrai turista lokál no turista internasionál bele mai vizita hodi kontribui ba reseita doméstiku.
UDT konsidera munisípiu Ataúru iha potensialidade bo’ot ba setór turizmu, tanba nee presiza apoiu kona-ba jestaun ba turizmu.
“Ataúru iha tipu turizmu oin-oin kompostu husi turizmu ekolojia, relijiozu mós pasajen tasi laran ho bio diversidade oin-oin. Atu dezenvolve di’ak liu tan area hirak nee presiza tebes apoiu formasaun hodi hasa’e abilidade munisípiu Ataúru rasik,’’ nia esplika
Sekretáriu ezekutivu ne’e mós subliña katak maioria komunidade Ataúro moris hanesan peskadór.
“UDT kompromete atu moderniza maneira peska tradisionál ba métodu peska modernu. Alende ne’e UDT hakarak mós atu sosa ró bo’ot ho ekipamentu modernu hodi fasilita peskadór sira bele hala’o sira-nia atividade peska ho fasíl no efétivu,”nia akresenta.
Liga ba programa bee moos, Nia hateten UDT sei tau prioridade hodi no husu Parlamentu atu aloka osan sufísiente ba fornesimentu bee moos ba komunidade Ataúro.
:”Ita presiza mós tau prioridade ba bee moos ,tanba komunidade Ataúru sei hasoru problema bee moos hodi responde ba nesesidade báziku. UDT mós sei husu ba parlamentu nasionál atu tau orsamentu sufisiente hodi apoiu fornesimentu bee mós komunidade tomak iha munisípiu Ataúr,” nia salienta.
Jornalista: José Belarmino De Sá
Editora : Nelia Borges
