iklan

ELEISAUN, MUNISÍPIU, VIQUEQUE

FRETILIN hakarak kria dezenvolvimentu integradu

FRETILIN hakarak kria dezenvolvimentu integradu

Militante no simpatizante partidu FRETILIN partisipa kampaña iha postu Viqueque Villa, domingu (14/05/2023). Imajen Tatoli/Vitorino Lopes da Costa

VIQUEQUE, 14 maiu 2023 (TATOLI)—Partidu Frente Revolucionária de Timor-Leste Independente (FRETILIN) hakarak kria dezenvolvimentu integradu bainhira kaer ukun.

“Bainhira FRETILIN ukun sei tau prioridade hadi’a sistema edukasaun sai di’ak liu, tanba sistema edukasaun rai-laran la orienta joven sira atu hetan serbisu. Tanba ne’e, bainhira ukun sei halo mudansa hotu ba setór sira sistema dezenvolvimentu integradu ba edukasaun, infraestura no agrikultura tanba FRETILIN ho vizaun integrada ba infraestutura moderna,” Sekretáriu Jerál partidu FRETILIN, Mari Bin Amude Alkatiri, hateten, durante kampaña iha postu Viqueque Villa, domingu ne’e.

Nia dehan, partidu ne’e hakarak hadi’a infraestura dalan hodi povu bele asesu ho di’ak no lori produtu ba merkadu, kria irrigasaun no bareira hodi proteje natar inklui hasa’e produsaun hare hodi garante sustentablidade rai-laran.

Notísia relevante : FRETILIN prioriza kria kondisaun ba manorin sira eleva kualidade edukasaun

Sekretáriu Jerál partidu FRETILIN, Mari Bin Amude Alkatiri, hato’o hela programa partidu durante kampaña iha postu Viqueque Villa, domingu (14/05/2023). Imajen Tatoli/Vitorino Lopes da Costa

Aleinde ne’e, kria mós formasaun ba joven sira sai kualidade, tanba nota katak joven sira hahú lakon esperansa hodi sai bá rai-li’ur.

Nune’e mós, Sekretáriu Jerál konsidera presiza hadi’a edifísiu eskola no muda kurríkulu eskolár.

“Edukasaun tenke kondíz ba ita-nia nesesidade serbisu rai-laran, presiza hasa’e mós koñesimentu profesór tanba sira tenke matenek maka hanorin ita-nia oan sira, edukasaun importante. Ohin loron koloka profesór no médiku sira ba suku maibé laiha fatin dignu ba sira, nune’e bainhira FRETILIN manán, sei kria kondisaun ba sira hodi halo serbisu ho di’ak,” Eis Primeiru-Ministru tenik.

Nia haree presiza tau-matan ba funsionáriu públiku sira hodi bele serví povu ho di’ak.

FRETILIN mós hakarak hadi’a sistema justisa, Tribunál, no órgaun independente sira, nune’e bele hatuur lei ho di’ak.

“La’ós judisiáriu deside ema ida-ne’ebé la sala, sai sala fali, ida-ne’e labele akontese iha Timor-Leste. Bainhira FRETILIN manán, ami sei hadi’a sistema justisa sira-ne’e, justisa tenke garante ita-nia nasaun moos hosi korrupsaun. Governu saida de’it maka ukun tenke kria programa hodi kombate korrupsaun. FRETILIN ukun, ba tinan rua korrupsaun hahú menus ba beibeik, ikus FRETILIN manán tenke lidera Governu,” nia hato’o.

Partidu FRETILIN ho númeru sorteiu 11 hahú kampaña tuku 14:00 to’o 18:00, ne’ebé hetan partisipasaun hosi militante no simpatizante hosi postu Lacluta, ViquequeVilla, Uatulari, Ossu no Uatucarbau.

Atividade ne’e hetan seguransa másima hosi Polísia Nasionál Timor Leste (PNTL) Viqueque no hetan akompañamentu hosi Komisaun Nasionál Eleisaun (CNE, sigla portugés) inklui entidade relevante seluk.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!