LAUTÉM, 14 maiu 2023 (TATOLI)- Vise Prezidente Partidu, Frente Revolucionário de Timor-Leste Independente (FRETILIN), Aniceto Guterres hateten, Partidu FRETILIN sei hadi’a konstrusaun estrada sira ne’ebé Aat iha Munisípiu Lautém.
“FRETILIN haree ho matan katak maioria estrada ne’ebé liga ba Postu adminstrativu, suku no aldeia kuaze aat hotu, tanba ne’e bainhira FRETILIN fila ba ukun , sei hadi’a estrada sira iha Munisípiu Lautém,”Vise Prezidente Partidu FRETILIN, Aniceto Guterres hateten ba povu Lautém iha kampaña komisiu ne’ebé realiza iha Kampu futubol 28 Novembro ex Kampaun 745 Poihoro Lospalos, domingu ne’e.
Nia hatutan, konstrusaun estrada importante ba povu Lautém atu bele halo konetividade ba movimentu transportasaun ho nune’e bele fasilita agrikultór sira-nia produtu agrikóla hodi fa’an iha merkadoria.
“Estrada tenke di’ak atu bele fasilita movimentu transportasaun ba suku no aldeia sira ho nune’e bele lori agrikultór sira-nia produtu agrikola ba merkadoria hodi faan no diversifika ekonomia husi baze no kontribui ba dezenvolvimentu nasionál iha Timor – Leste,”nia dehan.
Vice-Partidu ne’e hateten, populasaun Lautém maioria moris iha vida agrikultura maibé, dala barak sira-nia produtu agrikola la folin tanba laiha estrada ne’ebé di’ak hodi fasilita transporte públiku sira, nune’e produtu agrikola hirak ne,e barak mak estraga.
“Tanba ne’e FRETILIN komprometidu hodi hadi’a konstrusaun estrada hotu, ne’ebé ho kualidade iha Munisípiu Lautém hodi dignifika povu agrikultór sira,” nia kompromete.
Entertantu Munsipiu Lautém kompostu husi Postu Administrativu neen ho suku hamutuk 34 inklui aldeia 180 ne’ebé maioria kondisaun Estrada ladun di’ak.
Alende tau prioridade ba kondisaun Estrada, FRETILIN mós promote sei tau prioridade ba Edukasaun iha Munisípiu Lautém no Timor laran tomak, tanba edukasaun nu’udar xave importante atu liga ba formasaun ho kapasidade oinsá atu kria kondisaun sira iha rai-laran ba juventude sira hodi hetan serbisu.
Jornalista : Camilio de Sousa
Editora : Nelia Borges
