AILEU, 14 maiu 2023 (TATOLI) – Sekretáriu Jerál Partidu Unidade Dezenvolvimentu Demokrátiku (PUDD), Aleixo de Carvalho Ximenes Monteiro, hateten Munisípiu Aileu nu’udar fatin istóriku ba funu libertasaun nasionál, tanba ne’e PUDD kompromete kuandu lidera Governu mak sei identifika sítiu turístiku atu dezenvolve sai turizmu komunitáriu, ho objetivu atu bele hatama reseita ba Estadu no fó benefísiu ba povu Aileu.
“PUDD aposta nian programa balun iha Aileu ida ne’e, tanba Aileu rasik sai fatin istóriku. Ita haree iha sítiu istóriku barak maibé to’o agora seidauk dezenvolve ho di’ak. Tanba ne’e PUDD iha programa pririodade ba Aileu, ida mak promove turizmu komunitáriu, oinsá identifika fatin turizmu sira iha Aileu halo sai hanesan fatin ba turizmu komunitáriu, atu bele atrai ema internasionál no nasionál bele hatama reseita ba Governu lokál, munisípiu no liuliu ba iha komunidade Aleu rasik”, Aleixo de Carvalho Ximenes Monteiro hateten ba jornalista sira bainhira remata atividade kampaña PUDD ho tipu diálogu komunitáriu iha salaun Konsellu Kombatente Libertasaun Nasionál (CCLN, sigla portugés), Munisípiu Aileu, domingu ne’e.
Sekretáriu jerál PUDD ne’e hatutan, PUDD mós iha programa seluk mak ba formasaun profisionál ba joven sira no programa seluk mak kuandu PUDD sei fó prioridade ba enjiñeiru agrikultura Munisípiu Aileu.
“Ami mós dada fila fali enjiñeiru agrikultura espesiál Munisípiu Aileu nia oan sira, hodi halo servisu oinsá dezenvolve agrikultura. Ita-bo’ot sira hatene Aileu iha kafé barak no riku mós ho produtu ortikúltura sira, tanba ne’e lori ita-nia enjiñeiru agrikultura atu dezenvolve agrikutura nune’e setór agrikultura iha munisípiu ne’e bele dezenvolve liután”, nia promete.
Tanba ne’e, Sekretáriu Jerál Partidu Unidade Dezenvolvimentu Demokrátiku husu ba Aileu-oan sira fó votu konfiansa ba PUDD iha 21 maiu 2023 hodi bele atinje objetivu ida ne’e.
“Povu fó fiar ba PUDD, ha’u hanoin ita bele realiza tanba ne’e husu ba povu Aileu hili partidu karik tenke hatene ideolojia partidu ne’e atu lori ita ba ne’ebé; labele naran ita hili de’it PUDD sei realiza programa sira ne’e, tanba PUDD aposta ona iha programa”, nia adianta.
Iha fatin hanesan, Koordenadór PUDD Munisípiu Aileu, Juvinal Noronha, promete sei servisu hamutuk kordenadór PUDD Postu Administrativu Aileu Vila, Remexio, Lequidoe no Laulara hodi fó vitória ba PUDD iha Eleisaun Parlamentár tinan ne’e.
“Ha’u sei esforsu maka’as ho estrutura postu PUDD nian hodi fó vitória ba PUDD iha Eleisaun Parlamentár tinan ne’e, atu bele dezenvolve sítiu turístku iha rai istóriku Aileu, tanba PUDD la’ós ko’alia de’it maibé aposta ona iha programa,” nia garante.
Jornalista : Natalino Costa
Editór : Zezito Silva
