OÉ-CUSSE 15 maiu 2023 (TATOLI) – Primeiru Ministru (PM), Taur Matan Ruak, sei hatuur fatuk dahuluk ba projetu estrada ho kilómetru 18 hosi Pante Makasar ba Oésilo, Rejiaun Administrativa Espesiál Oé-Cusse Ambeno (RAEOA).
Prezidente Autoridade RAEOA, Arsénio Paixão Bano, segunda ne’e fó-sai katak, ajenda lansamentu ba reabilitasaun estrada nasionál ne’e sei realiza iha loron 16 fulan-maiu no lansa hosi Primeiru Ministru (PM), Taur Matan Ruak.
Notísia relevante: 15 maiu, Autoridade RAEOA lansa estrada nasionál Pante Makasar-Oésilo
“Aban, ita lansa estrada nasionál Tono ba Oésilo, Primeiru Ministru mak sei lansa, tuir loloos ohin, maibé serbisu balu presiza kompleta, entaun iha adia ba aban,” Arsénio Paixão Bano, informa ba jornalista sira iha Oé-Cusse.
Projetu reabilitasaun estrada nasionál ne’e pakote I sei hahú hosi eis merkadau Tono, suku Cunha, sub-rejiaun Pante Makasar to’o froneira Napan, suku Bobometo, sub-rejiaun Oésilo ho distánsia kilómetru 18.
Projetu ne’e ezekuta hosi empreza internasionál PT Waskita Karya, ho valór kontratu $33,915,000.00 (millaun $33-resin). Orsamentu ne’e Autoridade RAEOA prevee hosi Orsamentu Jerál Estadu (OJE) 2023 nian, ho durasaun serbisu durante tinan rua.
Notísia relevante: Waskita Karya sei ezekuta projetu estrada nasionál Pante Makasar-Oésilo ho millaun $33-resin
Jornalista : Abílio Elo Nini
Editór : Evaristo Soares Martins
