iklan

HEADLINE

ETAP promove istória no kultura Timór iha Muzeu Peterborough, Reinu Unidu

ETAP promove istória no kultura Timór iha Muzeu Peterborough, Reinu Unidu

Ezpozisaun "Journey to Timor" iha múzeu Peterborough.

DILI, 15 maiu 2023 (TATOLI) – Timor-Leste (TL) liuhusi ETAP (East Timorese Association Peterborough-UK) halo ezpozisaun iha Muzeu Peterborough Museum, Reinu Unidu, hahú loron 05 to’o loron 20 Maiu kona-ba istória no produtu orijinál Timór no mós kona-ba istória oinsá Timoroan hahú sira-nia moris no serbisu iha sidadi Peterborough. Abertura espozisaun hosi Majór Peterborough, Konselleiru Alan no Embaixadór Repúblika Demokrátika Timor-Leste (RDTL), London, João Paulo Rangel, iha sesta (12/05) liubá.

Ezpozisaun ne’e rasik organiza ho tema Journey to Timor ka Viajen ba Timor.

Embaixadór RDTL-London, João Paulo Rangel, hodi Estadu Timor-Leste hato’o agradesimentu ba Majór Peterborough, Konsellu Peterborough no autoridade sira seluk ba ospitalidade ne’ebé fo’o ona ba Timoroan sira iha sidade Peterborough, Reinu Unidu.

“Ha’u hodi Prezidente Repúblika, Primeiru Ministru no povu Timór hotu nia naran hakarak hato’o profundu agradesimentu ba apoiu no ospitalidadi ne’ebé sidade Peterborough fó ba Timoroan sira iha Peterborough. Ohin loron United Kingdom sai hanesan uma ida ba Timoroan besik rihun neen nulu ne’ebé moris no servisu iha UK”, João Paulo Rangel iha ninia intervensaun, tuir komunikadu ETAP ne’ebé diriji ba TATOLI, ohin.

Embaixadór João Paulo Rangel fó Tais ho salendang Timór ba Major Peterborough, Konselleiru Alan Dowson.

Prezidenti komunidade Timor Peterborough, UK, Celso Oliveira hateten, besik ema rihun ida mak oras ne’e hetan oportunidadi serbisu no eskola iha sidade Peterborough.

“Ha’u hanesan prezidenti komunidadi Timor iha Peterborough hakarak mós agradese ba apoiu ne’ebé sidade Peterborough fó ba ami Timoroan sira. Ha’u senti orgullu tanba moris iha sidade ida ne’ebé nakonu ho diversidadi kultura maibé sempre promove armonia no igualdade. Ohin loron timoroan besik rihun ida moris no serbisu iha sidade Peterborough. Inan-aman serbisu iha fabrika, oan sira sira frekuenta eskola hosi primaria to’o universidade”, Celso Oliveira hateten, iha ninia abertura intervensaun.

Majór Peterbrough, Konselleiru Alan Dowson haktuir katak sidadi Peterborough nakonu ho diversidadi kultura.

“Peterborough sempre fó benvindu ba ema hotu-hotu, inklui timoroan sira. Sidade Peterborough sidade ida koñesidu hanesan sidade ne’ebé nakonu ho diversidade kultura. Bainhira ita buka moris foun iha rai ida, foufoun ita dehan ha’u ba lalais de’it ha’u fila fali. Maibé, ita hela kle’ur tanba rai ne’e lori ona oportunidade foun mai ita, tanba ne’e diversidade buat ida furak tebes iha mundu ne’e”, Majór Peterbrough, Konselleiru Alan Dowson tenik.

Ezpozisaun Timór iha múzem Peterborough halo ho objetivu tolu, atu promove istória no kultura Timor nian, atu divulga istória kona-ba ema Timoroan hahú moris no servisu iha sidadi Peterborough no atu selebra tinan 21 Ukun rasik aan.

Marka prezensa iha abertura espozisaun ne’e mak Majór Peterbrough, Konselleiru Alan Dawson, Vise-majór, Konselleiru Nick Sandford, Membru Parlamentu Paul Bristow, membru konsellu sidade no komunidade sira seluk.

Iha fali tempu dadeer, Embaixadór RDTL-London, João Paulo Rangel halo vizita kortezia iha Town Hall ba Majór Peterbrough, Konselleiru Alan Dawson no Kamára munisipál Peterborough Konselleiru Wayne Fitzgerald hodi lori Estadu Timor nia naran fó agradesimentu ba apoiu tomak ne’ebé komunidadi timoroan sira iha sidadi Peterborough simu.

Dezde tinan 2001, Timoroan hah’u buka moris no servisu iha sidadi Peterborough. Hafoin Timor-Leste proklama independénsia iha 2002, númeru Timoroan buka moris iha sidadi Peterborough aumenta ba bebeik. Ohin loron besik rihun ida mak serbisu no eskola iha sidade Peterborough, Reinu Unidu.

Tatoli

iklan
iklan

Leave a Reply

iklan
error: Content is protected !!