DILI, 15 maiu 2023 (TATOLI) – Koordenadór Eskola Bázika Filiál (EBF)Fatuhada, Reinaldo Pereira, hatete implementasaun merenda eskolár refere ba fulan sanulu de’it tanba janeiru no fevereiru laiha.
“Implementasaun la másima tanba fulan-janeiru no fevereiru laiha merenda eskolár. Tanba ne’e, Governu liuhosi Ministériu Administrasaun Estatál (MAE) prevee de’it orsamentu ba fulan sanulu, sura hosi marsu to’o dezembru 2023”, Reinaldo Pereira hatete iha EBF Fatuhada, segunda ne’e.
Responsavel ne’e salienta totál orsamentu ne’ebé prevee ba merenda eskolár hamutuk $68.438 destinadu ba alunu hamutuk 931.
Verba ba programa ne’e fahe ba iten rua, ba estudante 931 ne’e sei hetan $52.136 no ba Ekipa Jestaun Programa (EJP) na’in-haat sei hetan $16.302.
“Kada loron estudante ida han sentavu 0,35 hosi segunda to’o sesta, nune’e ba totál estudante 931 ne’e kada loron han hamutuk $325.85”, nia esplika.
Ba grupu EJP na’in-haat ne’ebé prepara merenda eskolár ne’e kada loron sei gasta sentavu 0,07 sentavu hodi halo kompara merenda eskolár. “Kada loron sira sei hasai $65,38 hodi prepara merenda eskolár ba estudante 93 ne’e”.
Programa Merenda Eskolár ba tinan ida ne’e diferente ho tinan sira kotuk tanba Ezekutivu entrega ba EJP sira maka organiza no hetan akompañamentu hosi profesór sira atubele aselera efetividade hosi implementasaun programa ne’e rasik.
“Ita-nia Governu muda fali sistema implementasaun merenda eskolár ba estudante sira iha territóriu nasionál ba fali EJP sira mak organiza ho razaun atu labele prejudika profesór sira-nia atividade ensinu aprendizajen ba alunu sira”, nia haktuir.
Jornalista: Tomé Amado
Editora: Maria Auxiliadora
