DILI, 15 maiu 2023 (TATOLI)--Ministériu Negósiu Estranjeiru no Kooperasaun (MNEK) liuhosi Diresaun Jerál Asuntu Konsulár no Protokolár, informa, nasaun Malázia no Indonézia aseita ona pedidu Governu Timor-Leste hodi autoriza utiliza pasaporte ho karimbu prorogasaun.
Konsellu Ministru antes ne’e aselera aprova dekretu-lei númeru 23/2023, 19 abríl kona-ba Prorogasaun Estraordinária ba prazu validade pasaporte eletróniku Timor-Leste.
Liga ho kestaun ne’e, iha loron 02 maiu 2023, Diretór Jerál Asuntu Konsulár no Protokolár MNEK, Embaixadór Amorim Dias, hamutuk ho Diretór Nasionál Asesoria Jurídika no Lejizlasaun, Nelinho Vital inklui Diretór Nasionál Identifikasaun Sivíl no Rejistu Kriminál, Nelson Manuel Moniz Belo hosi Ministériu Justisa, hala’o reuniaun ho Korpu Diplomátiku sira ne’ebé rezidente iha Dili, Timor-Leste, hodi esplika no fahe informasaun kona-ba desizaun.
“Hafoin reuniaun iha loron ne’ebá, aleinde espresa sira-nia apresiasaun ba inisiativa hodi partilla informasaun importante kona-ba medida temporária ne’ebé Governu Timor-Leste foti ona, Reprezentante Korpu Diplomátiku sira mós komunika ona informasaun hotu ba sira-nia kapitál, inklui mós pedidu atu apoia medida temporária kona-ba Prorogasaun Estraordinária ba prazu validade Pasaporte Eletróniku Timor-Leste,” refere nota nota ne’ebé Agência Tatoli asesu, segunda ne’e.
Notísia relevante : Governu deside prorrogasaun estraordináriu ba prazu validade pasaporte eletróniku Timor-Leste
Nune’e, liuhosi korrespondénsia diplomátika MNEK, iha loron 3 maiu 2023, transmite mós nota verbál númeru 75/DGACP ba Korpu Diplomátiku sira ne’ebé rezidente no hirak ne’ebé la rezidente iha Dili, kona-ba detallu hosi Governu nia desizaun ne’e, inklui mós ho modelu karimbu prorogasaun nian.
Hatan ba nota ne’e, iha loron 10 no 12 maiu 2023, MNEK simu ona resposta pozitiva hosi Governu Repúblika Indonézia no Governu Malázia, liuhosi korrespondénsia diplomátika No. D. 0060 / KBRI / V / 2023 ho JG 36/2023, hosi sira-nian Embaixada iha Dili katak Governu rua aseita ho medida temporária ne’ebé Governu Timor-Leste adopta ona no sei fasilita sidadaun Timor-Leste ne’ebé utiliza pasaporte ho karimbu prorogasaun, ne’ebé aprova ona hosi Konsellu-Ministru liuhosi dekretu-lei númeru 23/2023 atubele tama no hela iha Indonézia no Malázia.
Entretantu, iha nota rua ne’e, haktuir mós katak autoridade hosi rai rua ne’e notifika ona mós ofisiál sira ne’ebé tau-matan ba pontu entrada sira hotu kona-ba desizaun ne’e.
“Informasaun ne’e kona-ba asesu atubele hetan karimbu prorogasaun estraordinária ba prazu validade pasaporte eletróniku Timor-Leste hodi bele hahú hikas viajen ba rai rua ne’e, sei fó sai hosi Ministériu Justisa Timor-Leste,” nia tenik.
Bazeia ba nota hosi Governu, Ministériu Justisa iha ona esforsu atu hetan kadernu nesesáriu atu emite pasaporte eletróniku Timor-Leste maibé iha fatór barak mak impede, nune’e hosi motivu ida-ne’e maka Konsellu Ministru deside atu prorroga validade pasaporte eletróniku ne’ebé kaduka durante períodu dekretu-lei ne’e tama iha vigór, to’o loron 06 maiu 2024, hosi kedas bainhira iha pájina disponível.
Jornalista : Antónia Gusmão
Editora : Julia Chatarina
