Postu Soibada implementa PMOPA ho atividade limpeza
MANATUTO, 15 maiu 2023 (TATOLI)—Administradór postu administrativu Soibada, munisípiu Manatuto, Luis Gonzaga da Silva, hateten postu ida-ne’e implementa ona Programa Mão de Obra Postu Administrativu (PMOPA) hahú ho limpeza, tesi-ai no hatetuk rai ba dalan kuak sira.
“Iha ita-nia postu ne’e rasik, PMOPA fó servisu ba grupu tolu no iha grupu nia-laran iha ema 20. Grupu sira-ne’e mak tesi ai no halo limpeza, grupu seluk fali foti rai-henek, rai-mutin, rai-metan hodi hateru rai ko’ak sira. Ida-ne’e mak PMOPA implementa ona iha Soibada,” nia hateten ba Agência Tatoli liuhosi telefónika, segunda ne’e.
Nia dehan, PMOHA implementa hosi lider komité aldeia ne’ebé forma hosi komunidade no grupu servisu sira-ne’e loron ida hetan $5.
PMOHA ne’e foku liu mak hadi’a ambiente, atividade produtivu hanesan hortikultura, pekuária no empreendedorizmu iha nivél aldeia bazeia ba potensialidade ne’ebé aldeia sira iha, nune’e bele hadi’a populasaun sira-nia moris.
Programa refere implementa hosi Ministériu Administrasaun Estatál (MAE) bazeia ba dekretu-lei nú. 23/2021.
Jornalista : Osória Marques
Editór : Cancio Ximenes
